Sonakshi leh Zaheer innei

Bollywood star Sonakshi Sinha leh Zaheer Iqbal te chu nimin khan Mumbai-ah an innei ta a, nizan dar 8 atang khan Bastian, Mumbai-a mo lawmna pui ber an nei tan dawn a ni.
Sonakshi hi Hindu a ni a, Zaheer hi Muslim a ni ve thung a, innei tura an inbuatsaih lai vel atangin chhungkaw lama neuh neuh an nei ve a, Sonakshi pa hi Bollywood star, hranglui Shatrughan Sinha niin, a hmeichhe lam chhungte hian an fanu muslim-a inleh an remti chiah lo niin a lang.
Mahse, an harsatna te chinfel a ni ta a, a mipa lamin an mo tur hi muslim-a a inleh kher an phut ta lo a, Zaheer Iqbal-a pa Iqbal Ratansi chuan, “Hindu emaw, Muslim emaw, eng serh leh sang mah buatsaih a ni lo vang. Civil marriage a ni ang,” tiin Sonakshi chu Hindu atanga Muslim-a a inleh kher an phut loh thu a sawi a, “Sakhuanain min tibuai tur a ni lo,” a ti.
Zaheer Iqbal hi Bollywood star Salman Khan te nen pawh inchhung khat hnai an la ni a, Zaheer hi lemchan lama kal tura fuihtu leh hmalakpuitu pawh Salman Khan hi niin an sawi. Zaheer hi chhungkaw awm thei tak atanga rawn chawr chhuak niin, a pa ni tlereuh lama sumdawng hlawhtling tak a ni.
Sonakshi leh Zaheer te hi kum sarih vel an lo inzui ve tawh a, an pahnih hian Salman Khan-a party buatsaih atanga intawng niin an sawi a, an pahnih hian ‘Double XL’ film-ah pawh an lo chang dun tawh nghe nghe a ni.