SORKAR HMALAKNA ZIRIN KASHMIR-AH

H. Lalchhandama

February ni 16-20, 2026 chhung khan Ministry of Information and Broadcasting hnuaia Press Information Bereau (PIB) huaihawtin Mizoram Journalists’ Association (MJA) member 13-te’n Srinagar leh a chhehvela sorkar laipui leh state sorkar hmalakna hrang hrangte tlawhin press tour kan nei a. Hun hlawkthlak tak tak kan hman dan leh thil chhinchhiah tlak kan tawn tlangpuite i’n thai lang teh ang.
February ni 15, 2026 khan Aizawla PIB head of office Rajeev Lourembam, IIS leh Aanush Mallick, IIS, hovin Kashmir-a press tour nei turin Lengpui kan chhuahsan a, Delhi-ah zan khat riakin; a tuk, February ni 16 zing dar 8 rik hma hretin Srinagar chu tluang takin kan thleng a. Khua a lo vawt var mai a, boruak a inlumlet thawk!
Srinagar-a chawlhkar khat zen zawn kan inkulhna tur hotel-a kan innghah fel hnuah, chhun dar 12-ah Srinagar-a PIB Regional Office kan pan nghal a. Director Qazi Mohammad Salman Ibrahim-a’n min lo dawngsawngin kan inkawm a. Kashmir-a media chanchinte kan zawh bakah Mizoram media dinhmunte kan hrilh ve zel a.
Kashmir-ah hian chanchinbu hi tawng chi thum — Kashmiri, Urdu leh English — a tihchhuah an ni hlawm. Chanchinbu chhuak pawh a tam hle a, a lian zual pasarih vel awm karah a tenau deuh zawk pawh a awm nual mai. Hei bakah, online leh digital-a chanchinthar site a awm nual bawk.

Central Sericulture Research & Training Institute
Pampore hmuna Central Silk Board (CSB) enkawl Central Sericulture Research & Training Institute kan tlawh leh a. An Director Dr Sakthivel N. chuan min lo dawngsawng a, ani hi Mizorama lo awm tawh a ni nghe nghe.
Helai hmunah hian pangang chaw atan thingtheihmu (mulberry) an ching nasa hle. Sorkar laipui pawhin nasa takin a tanpui a. An silk siam chhuahte hi a tam lam aiin a quality an ngaih pawimawh zawk avangin, khawvel huap pawha tha bika ngaih niin an sawi.
Mizoramah pawh lo awm tawh an director Sakthivel N chuan Mizorama Sericulture department chu department tê a ni lem lo. Mizoramah Silk Samagra kal pui a ni a, he mi hnuaiah nasa taka hmasawnna kalpui theih a nih thu a sawi a. Silk bik pawh hi sorkar laipuiin uar deuh deuh a tum a, hma a la mek. Mizoramah pawh silkworm a thar that theih thu a sawi bawk.

J&K Handloom & Handicrafts
February ni 17, 2026-ah J&K Handloom & Handicrafts department hmun kan tlawh leh a. An director Mussarat Ul Islam chuan min lo dawngsawng a, a pisa-ah rei ngial kan inkawm a. Hma an la nasa bawk a, sawi tur pawh a ngah hle.
Mussarat Ul Islam sawi danin, J&K hi UT a ni emaw, State a ni emaw, sorkar laipuiin en hranna a nei lem lo va. Kut themthiamna lamah an hmalakna tur sorkar laipuia an theh luh chu, an pawmpui nghal zel thin a. Agriculture and Allied sector tih loha handloom and handicraft kaltlangin an sum dehchhuah tamna ber a ni nghe nghe.
J&K hian khawvel huap pawhin handloom leh handicraft hi an hmingthanpuina pakhat a ni. Geographical indication (GI) tag pawh handicraft bikah 18 an nei a. India rama ‘GI lab’ nei awmchhun niin an inchhuang hle.
Handloom lama an kutchhuakte zingah carpet leh shawl hi khawvel huap pawha an larpui, an thawn chhuah nasat a ni. A bikin, Iran nena inkungkaihna lian tha tak an neih hi an chhawrin, an thawn chhuak tam hle a. UAE, Kuwait leh Russia-ah te an thawn chhuak nasa bawk.
Sorkar laipui Ministry of textiles hnuaiah scheme hrang hrang an kalpui a. Ministry of Micro, Small & Medium Enterprises kaltlangin, scheme hrang hrang neiin handicraft leh handloom lam an chawi lar zel bawk.
Sorkar laipui nena tangrualin, kutthemthiamna lama inhmangte, an thiamna inhlanchhawng thei turin an fate lehkhazirna re-imburse sak an ni a. Hetianga re-imburse sak hi MBBS te hial pawh an awm a ni awm e.
World Crafts Council (WCC) chuan June 2024 khan Srinagar hi World Craft City atan a lo puang tawh a. India khawpui zingah Srinagar bakah hian Jaipur, Mysuru leh Mamallapuram te chu WCC chuan World Craft City atan a lo puang tawh bawk.
Hemi ni vek hian sorkar laipui sum hmanga changtlung taka an din, Indian Institute of Carpet Technology (IICT) kan tlawh bawk a. Director Zubair Ahmad Mir nen kan inkawm bakah, kut lawnga carpet an siamna hmun leh an siam lai te tlawhin kan thlir bawk a.
Khawl hmanga carpet an tah te leh kut lawnga tah te chu a man pawh a inthlau viau a. Kut lawnga an tah hi a man a to a, a tah hun chhung pawh a kuma kum te a ni a. He’ng kut lawnga carpet an tahte phei chu mi nawlpui tan lei mai mai phak pawh a ni lo va. A tam zawk chu Middle-East lamah an hralh chhuak ber.
Carpet te hi GI tag nei vek an ni a, an kutchhuak reng reng chu QR Code an dah chu scan theih vekin a awm a. A tak leh an entawn chhawn chu a hriat hran theih viau dawn tihna a ni.
IICT Campus chhungah hian Pashmina Testing and Quality Certificate Centre leh Craft Development Institute te min tlawhpui bawk a. Ladakh-a cheng bik beram chi khat, pashmina hmul atanga silk an siam te an endikna hmun a ni deuh ber a. Helai hmun kaltlang hian Kashmiri shawl chi thum chuan GI tag an nei tawh.

Beigh chhungkua
Srinagar-a kut lawnga shawl leh carpet siamtu hriat hlawh, Beigh chhungkua te’n hna an thawhna hmun kan tlawh bawk a. Anni chhungkua hi kum 200 chuang kut lawngin, hriau hmangin shawl siam an lo kalpui tawh a. An chhungkaw chanchin leh an hnathawh dan te chu chanchinbu lam pawhin a hriatpui bakah, chawimawina pawh an dawng nual tawh. Ambani chhungkua pawhin an shawl siam an lo lei sak tawh nghe nghe.
Beigh chhungkua hian kut lawngin shawl pakhat thui par nan mi pakhatin kum 4/5 te a hmang a. Ni khatah Rs 500 ang zela chhut sakin, shawl pakhat Rs 7,20,000 man te an thui hial.

CSIR Indian Institute of Integrative Medicine (IIIM), Field Station, Jammu
February ni 18-ah Pulwama-a thlai/pangpar hmanga damdawi leh rimtui siam chhuahna hmun CSIR-IIIM kan tlawh leh a. He lai hmunah hian thlai/pangpar chin bik neiin, suma chantir awlsam leh hlawk chi an ching ber a. Lavender an ching nasa ber a, Tulip, Rose, Sunflower, Rosemary te pawh an ching bawk.
Tulip bik hi, kum 2007 khan Holland (Netherland) atanga la lutin an ching tan. Kan tlawh hun lai hi a par lai a ni lo hlauh!
He’ng an thlai/pangpar chinte atang hian oil an la chhuak a, chu chu sawngbawlin damdawi leh rimtui siam chhuahna an hmang leh a ni.
An thlai/pangpar chinte a inthlahpun that theihnan leh pollination siamtu atan a bulhnai maiah Khuai an khawi a. Khuai khawi lai bawm 130 vel zet a awm a. Khuai zu pawh an ngah.
India International Kashmiri Saffron Trading Centre, Dussu
February ni 19-ah Pampore-a saffron chinna hmunpui min fanpui leh a. Tariq Ahmad Parrey (AEA), incharge Collection Centre, IIKSTC, Dussu chuan saffron an chinna hmun leh sawngbawl dan te min hrilhfiah nghal zel bawk a.
Saffron hi Kashmir-ah chuan an ching uar a. Thingpuiah te, thil chei nan te, agarbati siam nan te, thil tihrimtui nan te, ei leh inah te, cosmetics atan te hian an hmang a. A sawngbawl a hautak em avangin a man pawh a tlawm thei lo va, GST nena chhutin gram khat hi Rs 389 te niin, kg-ah cheng nuai 4 te a ni hem mai.
Helai hmuna thawktute sawi danin, Saffron hi Middle-East lamah an thawn chhuak nasa a. Kum khatah metric ton 16 vel an thar chhuak a. Khawvela saffron thar chhuak hnem ber chu Iran niin, a dawt chu India a ni.
India hian saffron a thar chhuah zatve vel ram chhungah an hmang a, a zatve dang chu Middle-East, Russia, Czech Republic leh Europe hmar lamah a thawn chhuak a ni.

Tlangkawmna
Srinagar leh a chhehvela sorkar laipui leh state sorkar hmalakna hrang hrang kan tlawhnaah hian, min lo dawngsawngtute hian an hnaah an chiang a. Zawhna apiang min chhang par par a, an hna chungchangah na na na chuan kan zawh bak pawh nileng sawi pai vek ang an ni.
Kashmiri ho taimakna leh hna an thawh dan chu an entawn tlak hle. A bik takin an mithiam ten dawhkan mai bakah a hmun ngeiah hna an thawk nasa a, rah tha a chhuah tih loh rual a ni lo.