Sorkara an thil ngiat thil pahnih kar nan Mizoram sorkar hnuaia thawkte’n hnathawk lova nawrh (pen/tool down strike) an tum a, a hun tur erawh rel fel a la ni lo.
-- Advertisement --
Nilaini khan FMGE&W (Federation of Mizoram Government Employments & Workers) huaihawtin taxation department Conference Hall-ah sorkar hnathawk pawl hrang hrang, FMGE&W hnuaia inziaklutte an inhmukhawm a, pen/tool down strike neih hi an rel a ni. Ni thum chhung neih ni se an ti a, a hun tur chu FMGE&W office bearer te’n lo ngaihtuah se an ti.
FMGE&W hian sorkar laipui thu anga DA (Dearness Allowance) tihpun te, hlawh a huna lak te leh pension hun kum 62 ni se tih te Mizoram sorkarah an dil a, chung thil pathumte ngaihtuah chuan an inhmukhawm a ni.
FMGE&W hruaitute chuan pen leh hnathawhna hmanraw hman loh an rel thu, mahse heta an nawrh chhan turah hian pension hun pawhsei tih hi a tel loh thu, DA chungchang leh hlawh a huna lak te hi nawrh an tum chhan a nih thu The Aizawl Post an hrilh a, pension hun pawhsei hi an nawrh chhanah tel lo mah se an dinna a nih reng thu leh dil zel an tum tho thu te an sawi.
DA hi thla ruk dana tihpun Thin a ni an ti a, thla ruk dana tihpun ve ni se tia sorkar hotute hnena an thlen tawh Thin thu leh, vawiin thlengin hmasawnna a la awm lo tih te an sawi a, hlawh pawh nikum May vel aTang khan a hunah an la tawh lo tih te an sawi.