Iranian inngaizawng kum 20 chho vel leka upate chu kawtthlera an lam lai video an post avangin kum 10 lung in tang tura tih an ni.
-- Advertisement --
An nupain corruption, nawhchizawrhna leh propaganda thehdarhah thiam loh chantir an ni a. Tehran’s Azadi (Freedom) Tower bula an lam lai an phochhuah vang a ni.
Iran thuneitute chuan tun hnaia morality police te kuta hmeichhe pakhatin nunna an chan avanga Iran a lungawilohna nasa tak thleng zui avangin an thikthu a chhe zual hle a. Nupate hian Iran-a lungawilohna thleng mek leh an lam lai chuan inzawmna a nei lo an ti ve thung.
An Instagram account-ah an lamlai an post hnu lawkah man zui niin an nupa hian follower maktaduai hnih dawn an nei a ni.
Iran-ah hian Iran regime in ‘riot’ tia a sawi anti-government protest nasa taka kalpui niin kum 22 leka upa Mahsa Amini chu nikum September thla khan police kuta a awm laia a thih vang a ni a. Amini kha a lu a khuh loh avanga man niin police kuta a awm laiin a thi zui a ni.
Tuna thiamloh chantir te hi Astiazh Haqiqi kum 21-a upa leh a bialnu Amit Mohammad Amhmadi kum 22-a upa te niin ‘corruption leh nawhchizawrhna sawimawi, national security kalha che leh sorkar kalh zawnga propaganda thehdarh’ tia puha thiam loh chantir an ni.
Man an nih hma hian fashion designer Haqiqi chhungkuaa an chenna chu dap hmaska phawt a ni a. An pahnih hian kum 10 lung in tang tura tih an ni phawt a. Hei aia rei pawh tang thei tura ngaih an ni bawk.
Iran-ah hian nikum September thla atang khan lungawihlohna nasa taka lantirin awm a, kum 1979 revolution hnua thuneitu tena harsatna an tawh nasat ber nia ngaih a ni bawk.
Lungawilote hnawhdarh nan leh tihtawp nan sorkar chuan hremna na tak tak a lekkawh a, mi pali lai a khaihlum tawh bawk a ni.
Amini thihna khan Iran-a thuk taka lungawilohna awmsa irhchhuah nana hman a nih rualin ram chhunga retheihna, hna vang, intluktlan lohna leh eirukna nasa tak avanga phunna lantirna nia ngaih a ni bawk.
Iran-a lungawilohna avang hian mi za tel tehmeuhin nunna chan phah tawhin mi sang tel manin an awm tawh bawk.