Sorkar siam tumin party-te indawr leh

Sorkar siam tumin party-te indawr leh
Lai Autonomous District Council (LADC)-ah sorkar tur a la hriat loh a, sorkar intawm siam tumin party-te an indawr tha leh.
January ni 6 khan MDC ngah ber MNF leh pathumna ZPM te’n sorkar intawm siam an tumna a tlawlh a, chumi hnuah party-te an indawr tha leh mek.
Kum hlui December ni 9-a vote chhiar a nih khan MNF leh MDC ngah ber dawttu Congress te an thawk dun mai tura ngaih a ni hman a, chumi hnuah MNF leh ZPM te’n Lairam Legislature Party dinin sorkar siam an tum leh. Tunah chuan thu chiang a la awm lo a, party-te indawr kual dan pawh chiang faka hriat a ni rih lo.
Chutih rual chuan a tira ‘chabi’ kawltu Congress party-in ‘chabi’ an kawl leh tawh a, Congress thawhpui apiang an sorkar dawn niin a lang mek.
Thu dawn pakhatah chuan MNF leh Congress an thawh dun hmel a, mahse tihfel erawh a la ni lo. MNF leh Congress hi ZPM thawhpui tum tawh ve ve an ni a, chuvangin ZPM ni lo mi dang thawhpui an tum ve ve a rinawm a, BJP leh independent ticket-a tlingte thawhpuiin awmzia a neih phak loh avangin, MNF tan Congress lo chu, Congress tan MNF lo chu, chutiang dinhmunah chuan an ding ve veah ngaih a ni.
January ni 7 kha LADC inthlana tling tharte term-a thutkhawm hmasa ber neih ni tur a ni a, chu pawh chu a hma ni khan larsap-in thulh turin a ti. Ningani lamah thu chiang zawk a awm a beiseiawm tih thu dawn a ni.