Sorkarin security mock drill nei turin state-te ti

Sorkarin security mock drill nei turin state-te ti
Pahalgam-a mi firfiakten April 22-a mi 26 an thah hnua India leh Pakistan inkara boruak sosang tak a awm mek laiin sorkar laipui chuan state eng emaw zat chu ‘miin a beih thuta vantlang invenhimna tur inbuatsaihna’ atan Nilaini hian security mock drills nei turin a ti.
Sorkar laipui thupek hi a khauh hle a. Hetiang drill neih hnuhnung ber chu kum 1971 daih tawh kha niin hemi kum hian India leh Pakistan chu hmun hniha an indo lai a ni.
Ministry of Home Affairs chuan state-te zawm tur a tihchhuahah air raid warning siren-te tiria inring tur te; civil mi, zirlai leh a dangte chu miin an beih thuta an him theihna tura chet lak dan tur tihchhintir te; thim hnuaia khawsak dan tur te; hmun pawimawh bikte rang taka khuh phui zung zung te leh hmun hima inlak chhuah ngeite la chhuak tura inhrilh zung zung leh tih chhin te a tel.
Pahalgam-a mi Pakistan nena inzawmna nei nia a hriat mi firfiakten civil mi 26 an thah hnuah ramri-ah boruak a la dai hleithei lo.
Pakistan chuan zan 11 chhung a zawnin Line of Control hrula Indian sipaite awmna lam hawiin silai an hmet puak tawh a. India pawhin Islamabad sipaite silai hmeh puah hi a chhang let ve bawk.
Punjab-a Ferozepur-ah chuan Pathianni zan khan cantonment area-a êngte chu zan dar 09:00 atanga 9:30 chhung tihthim a ni a. Officer-in Punjab State Power Corporation Ltd (PSPCL) hnenah ruahman lawk anga exercise lak hun tithim turin a ti a ni.
India chuan kum 2019-a Pumwama-a sipaite beih an nih hnua Jammu & Kashmir-a beihna a tawh nat ber hi chhan let ngei a tum a. Thawhtanni pawh khan Prime Minister Narendra Modi-a chuan Defence Secretary Rajesh Kumar Singh-a hmuin New Delhi-in a chhan let dan tur chungchang an sawi dun ngei nia hriat a ni.
An inkawmna hian darkar khat chuang a awh a. A hma ni khan prime minister hian Air Chief Marshal Amar Preet Singh pawh a lo kawm tawh a, Modi-a hian sipai chi thum – Army, Navy leh Air Force-a an hotu lawk ber theuh a kawm kim ta a ni.
Beihna a thlen hnu lawkah khan prime minister hian a titu leh a phena awm zawng zawngte chuan an an rinphak baka na hremna an hmu dawn tih a sawi tawh a. Political party hrang hrang hruaitute pawhin politics-a an inepna dah thain sorkar chet lak dan apiang an thlawp tur thu an sawi hlawm.
Defence Minister Rajnath Singh-a chuan Pathianni khan ‘ti tura in duh chu ramin a ti dawn’ tia sawiin India chetna tur chu a na hle dawn nia ngaih theihin a sawi.
Beihna a tawh hnuah India hian Pakistan hrekna hrang hrang a kalpui a, Indus Waters Treaty 1960 chu titawp lailawkin hei hi kum 1965, 1971 indo leh 1999 Kargil indo lai pawha a la tih ngai loh a ni a. India-a Pakistan embassy-a thawk eng emaw zat a thawn haw bawk.
Pakistan chuan India hi chhangin tui luang tihtawp chu indona chi khat a nih thu leh inremna awm zawng zawng tihtawpah a vau a, heng zingah hian Simla Agreement tihtawp pawh a tel a, hei hi Line of Control palzutna a tling dawn a ni.
Pakistan hian Simla Agreement hi a titawp lailawk a nih chuan Line of Control dinhmun hi a chiang dawn lo va. Ni 11 liam ta zawngah khan Pakistan hian kum 2003-a inkahhai puan bawhchhiain silai a hmet puak ziah a ni.