South Korea-a lei dawh lai chimah thawktu pali thi

South Korea-a lei dawh lai chimah thawktu pali thi
South Korea-a kawngpuia lei dawh lai mek chu Thawhlehni khan a chim a, mi pali an thi a, mi parukin hliam an tuar bawk tih fire thuneituten an sawi.
National Fire Agency chuan an khawpui, Seoul aTanga chhim lam km 65-a hla, Anseong khawpuia kawngpui siamnaah hian mi 10 an thawk mek tih an sawi.
Chhiatna hi an rama zing dar 9:49 (India-a zing dar 06:29)-a thleng niin lei, thira dawl chu a chim a, a chim karah thawktute an tang a ni. A chim chhan hi hriat a la ni lo.
Land, Infrastructure & Transport Ministry chuan thuneitute a hmunah tirh nghal an ni tih a sawi.
A siam hna thawktu, Hyundai Engineering chuan thi an awm leh hliam tuar an awm chu pawi an tih tak zet thu an sawi. February thla tirah khan lawngchawlhna khawpui, Busan-ah khualbuk sak lai a kangah mi paruk an lo thi tawh a. Mi 100 chuang hmun himah suan chhuah niin thawktu 14 chu in chung bera an chuan chhuah hnuah helicopter-a lak an ni bawk.
Nikum June khan lithium battery factory-ah kangmei a lo chhuak tawh a, thuneitute chuan himna dan zawm that loh leh enkawl uluk loh vangah a puh a, thawktu 23 an thi a ni.