South Korea ram kangah mi 24 vel thi tawh

South Korea ram kangah mi 24 vel thi tawh
South Korea chhimchhaka hmun eng emaw zata ram kang mekah mi 24 vel an thi tawh.
Thi tam zawk hi kum 60 leh 70 bawr vel an ni tih thuneituten an sawi a, mi 26 vel inhliamin an zinga 12 chu an na hle a. Mi 23,000 chuang chu an chenna in atangin an chhuah a ngai bawk tih an sawi.
President lailawk, Han Duck-soo chuan ‘beisei phak bak’ harsatna an tawh thu leh ‘kan ram chanchina ram kang nasa ber record’ siam a nih thu a sawi.
Ram kang vang hian Uiseong khawpuia kum 1,300-a upa temple a kang chhia a, a chhunga hnam thil hlu tak takte lak chhuah niin hmun himah lak an ni.
Gounsa temple hi he province-a temple lian ber pakhat niin AD 618-a sak tawh a ni.
Joseon Dynasty (1392-1910) huna Buddhist in sak hlui leh an roh tak chu a kang chhe bawk niin forest thuneituten an sawi.
Ram kang hi Zirtawpnia Sancheong county atanga intan niin Uiseong county a kang kai.
Thli na leh ro takin a pui tha a, an thenawma Gyeongbuk, Uiseong, Andong, Cheongsong, Yeongyang leh Sancheong county a kai tawh.
Thawhlehni khan national fire agency chuan ram kang response level sang ber a puang.
Nilaini khan kang thelhna helicopter chu Uiseong tlangah tlain a khalhtu a thi a, a tlak chhan hi chhui mek a ni.
Kang thelh tur hian a thelhtu sang chuang leh sipai 5,000 chuang tirh chhuah an ni a, Korea-a US sipai awmten an helicopter an thawh chhuahpui bawk.
South Korea-ah hian ram kang nasa tak hi a thleng tam lo hle a, tuna hi an ram chanchina thihna thleng tam ber a ni tawh.
Ram hectare 17,000 chuanga zau kang tawhin a kan zau zawk hi South Korea chanchina a zau ber pathumna a ni mek.
Andong khuaa chuan mipuite elementary school-ah an tlan khawm a; mahse, thli na takin a chhem nasat avangin inthiar chhuak tura tih leh an ni.
President Han-a chuan thla na lutukin kang thelh leh chhanchhuah hna thawh a timuang niin a sawi.
South Korea hian kuminah hian ruah an dawn thin ang zat an la dawng pha lo va. Kuminah ram kang 244 nei tawhin nikum tun ang hun aiin a let 2.4-in a tam zawk.