South Sudan-a thlawhna tlaah mi 20 thi

South Sudan-a thlawhna tlaah mi 20 thi
South Sudan-a thlawhna tlaah a chuang mi 20 an thi a, mi dang pakhat erawh a dam chhuak hlauh niin an ram sorkarin a puang.
Thlawhna hi an khawpui, Juba pana thlawk niin Nilaini zing khan Unity State-a tuialhthei khur an chhuahsan hnu minute thum lekah a chesual niin Petroleum Minister Puot Kang Chol chuan a sawi.
A chuangte hi tuialhthei khura thawkte vek an ni a. Ram dang mi panga – Chinese pahnih, Indian pakhat leh Ugandan pahnih an tel a, mi dang 15 chu South Sudanese an ni.
An tlak chhan hi chiang taka hriat a ni lo va, thuneitute chuan chhui nghal a ni tih an sawi.
“An chhungte leh an hmangaih tak chântu chhungkuate kan tawrhpui a, hun khirh tak an tawh mekah hian kan rilruin kan hre reng a ni,” tiin Chol-a chuan a sawi.
Tuialhthei khura thawkte hi mipa vek niin Greater Pioneer Company (GPOC)-in a chhawrte an ni a, an thlawhna hi Light Air Services Aviation Company ta a ni.
GPOC hi sorkar ta a ni a, India, China, Malaysia leh South Sudan company-te nena inzawma thawk an ni a. Tuialhthei dap lama thawk an ni deuh ber.
South Sudan-ah hian thlawhnaa veivahna hi tihhmasawn a ni lo hle a, himna pawh a chhe hle.
Thlawhna chesual pawh a tam a, a chhanah hian chuang an tam lutuk thin leh khaw awm dan mawhpuh deuh ber a ni thin.
Kum 2021 khan UN hnuaia World Food Programme (WFP) tana tuialhthei phur thlawhna chu Juba bulah a lo tla tawh bawk a, mi panga an thi.