Spa tlankawngah Dutch rawlthar a thi

Belgium rama motor racing hmunhma hmingthang Spa-Francorchamps circuit-ah Inrinni khan Formula Regional European Championship race nghah niin, tlankawng nala a chetsualna hliam tuarchhuak zo loin Dutch rawlthar kum 18 mi Dilano van’t Hoff a thi.
Dutch MP Motorsport team tana inlan Dilano hi 2021 Spanish F4 championship-ah khan chak ber niin, Belgian Grand Prix circuit-ah hian vanduainain a tlakbuak ta a, a team vawn MP Motorsport chuan an driver thihnain a tilungngai takzet tih thuchhuah siamin an tarlang.
Media report-in a tarlan danin, van’t Hoff hi intlansiak tawp lama car insubuai nuai nuai karah a vanduaiah a tan ta a ni.
Spa Francorchamps-a For-mula Regional European Cham-pionship second race hi 4 Hours of Spa endurance race thlapwna peng pakhat (support prog-ramme) niin, he intlansiaka nunna chan sunna hun hi Austrian Grand Prix-a Formula Two team leh driver-te’n an hmang.
Formula One chief executive Stefano Domenicali chuan motorsport-a a tum ram thleng tura a beihna kawngah Dilano chuan a nun a hlan tih sawiin, motorsport chhungkuain thihna tawk chhungte leh amah hmangaihtute zawng zawng a hre rengin a tuarpui tih a sawi.
McLaren pawhin tawrh-puina tichhuakin, “McLaren Racing Team chu vawiina Dilano van ‘t Hoff thihna hian a tilungngai hle a, a kalsan a chhungte leh thian-thate bakah hun harsa tak tawk mek MP Motorsport team a tawrhpui a ni,” tiin.
Kum li kalta khan Spa-Francorchamps tlankawnga F2 race-ah French racer Anthoine Hubert pawh chesualin a lo thi ve tawh bawk a ni.