RK Dawla
Mb 9366095658
-- Advertisement --
1. July thla kan thleng tan a. 2023 kum laihawl tak kan thleng tan mêk. Chutih laiin Mizoram hmun tam takah ruahtui kan la dawng mumal lo hle mai a. Lunglei District (a bikin district hmar lamah) phei chuan inchhunga hman tur khawp, tuidawn atangin ruahtui kan dawn lohna a rei leh ta! Kawrte tui hmanga leilet siam thin tam tak chu, an leilet siamna tham kawrte tui an hmuh loh vangin an buh kuite an thlir an thlir ringawt rih a ni.
2. El Nino vangin Monsoon ruahtui kan dawng tlêm dawn niin a lang chiang tan a. Kawng laih leh inhmun tur ilo laih nasat vangin kan ruahtui dawn chhun lah lui tui tinutu mai a ni mêk bawk. Kan harsatna tawh mêk hian min ben-harh ngei chu a ngai a ni. Hmasawnna hnathawhte hi environment tâna pawi khawih nêp thei ang ber a nih theih nân kan tan hle a ngai a. Chutia nih loh chuan, Building tha pui pui leh kawngpui thlûr nalh tak kârah tui kan nghei hnai tlat a ni. Kan thlai chin pui ber, Buh pawh hi technonogy danglam (SRI, Direct seeding etc) hmanga kan buaipui chhoh a tul fo dawn. Kan khawvel sik leh sa lo danglam mêk hian a hmaa kan lo tih tawh dan kha a rawn nam-nûl chho viau dawn niin a lang. Chuvangin, kan lo inbuatsaih a, kan lo inpeih a ngai hle a ni.
3. Ruahtui a mumal loh hian leiin tui a khawl tam thei lova. Chu chuan a kum leh thal tuihna a titlêm êm êm thin. A awmzia chu kumkhat ruahtui tlêm hian, kum lokal lehzel turah pawh nghawng a nei chhâwng zel thin tihna a nih chu. Kan ramah ngat phei chuan, ruahtui kan dawng tlêm a ni mai lova, kan dawn chhun ang angte pawh tuihâwk nu takah changin kawrah a liam bo teuh teuh mêk a. Lei laih hliama ruahtui tlate chu khuarel kalphung pangngaiin a kal thei lo thin a ni.
4. Hei mai hi a la ni lova. Pi leh pu atanga kan lo chin than, thil pawi tak pakhat kan la uar mêk bawk. Chu chu kawrah bawlhhlawh paih kan la ching hi – thingtlang kilkhawr atanga Aizawl khawpui thlenga rualkhai taka kan natna vei chu – bawlbhlawh enkawl leh sawngbawl danah hian a ni âwm e. Kan kawngpui kamah nise bawlhhlawh ip lian pui pui leh plastic bottle leh tawih theilo hmawmsawm kâwr a indawt zui hlawm bawk. Kan ram a zîm a, changkanna hmanraw thar lo chhuak hian bawlhlawh tawih thei lo a rawn chhêkkhawm zel bawk si a. Hun harsa kan hmachhawn tan mêk niin a lang. Tin, thingtlang lama kan bawlhhlawh sawngbawl dan pawh, a huhova hmun khata paih leh hâl kha a ni mai a. A khû leh vâp kha boruak leh leilung tibawlhhlawhtu hlauhawm tak a ni mêk bawk. A tihngaihna awm tawh loh hun kan thlen hma a, kan tun mêk SITUATION hmanga kua kan hreuh a va hun tawh tak êm!
5. Ni tina kan khawsak leh huan hmunhma kan enkawl danah hian, “Hei hi ka ram a ni a, ka tu leh fate ka lo rochun tur a ni” tih ngaihtuahna hi lian ber sela a va duhawm tak êm! Farming hi vactional or amateur ordeal lek a ni lova, kan ram hi ka damchhung atân chauha pawimawh a ni hek lo. Vawiina mi tam berte chêt dan hi chuan, kan tu leh fa, kan thlah lokal lehzel turte hmakhua hi a ti-êng fahran lovang. Bible-in sual tinrêng bul tia min hrilh TANGKA SUM NGAINAT hi Mizo nawlpui hian a dikzia kan tilang mêk tih kan chhût ngai emt He hnam hi Pathian hmaah kan kir leh a, Amah tih chunga hna tangkai thawh kan uar takzet a nih chuan a dingchhuak mawlh ang. Chutia nih lova, TANGKA SUM pathian rêng rênga vawiina kan awm anga kan kal chho zel a nih chuan, khandaihin min la ei zo mawlh ang