Spain hmaah Belgium

World Cup 2026 khelh mekah inrinni zing dar 1:30-ah quarter-final pahnihna khelh a ni dawn a, SoFi Stadium-ah Spain leh Belgium ten semi-final luh an inchuh dawn. Belgium in champion tura rinkai Spain kawng dal tuma tan an khawh dawn a, inkhel en chakawm tak a ni.
An kal kawng
World Cup 2010-a champion leh European champion lai Spain hi Group H-ah awmin beisei angin bul an tan tha lo. Cape Verde nen goal awm lovin an inhnehtawk phawt a, an match hnihnaah 4-0 ngawtin Saudi Arabia an sawp thung. Group match hnuhnung berah 1-0 in World Cup a vawi hnih champion tawh Uruguay an hneh hram a, group champion ni chungin last 32 an lut. Last 32-ah 3-0 ngawtin Austria an sawp a, an khel tha tawlh tawlh. Austria an hneh hnuin last 16-ah fiahna hautak an hmachhawn a, team lian Portugal nen an intum. Champion tura rinkai Portugal lakah tha zeta inlanin game mawi leh tha an khelchhuak a, 1-0 a hnehna changin quarter-final an lut. Quarter-final an luh thlengin goal 9 an thun a, goal an la chhuah miah lo. Clean sheet vawi nga ngawt a neih tawh vangin si nghak Unai Simon atan Golden Glove a hnai viau tawh.
Spain ang thovin Belgium pawhin bul an tan tha lo naa an khel tha tulh tulh. Anni hi Group G-ah awmin Egypt leh Iran an hneh zo lova, 5-1 ngawta New Zealand an hneh vangin Group champion ni chungin last 32 an lut. Last 32-ah African champion Senegal hmachhawnin an tlawm teuh hle. Minute 85 thlenga si hnih an phurh hnuin mak tak maiin hnehna an chang let a, last 16 an lut. Last 16-ah inelna thlengtu USA chu 4-1 ngawtin an hneh a, Spain hmachhawn turin quarter-final an lut. Quarter-final an luh thlengin goal 13 an thun a, goal 4 an chhuah tawh.
Head to head
Spain leh Belgium te hi Europe a awm tlang an ni bawk a, intum ngunin an inhrechiang thawkhat viau. Vawi 23 lo inhmachhawn tawhin Spain in vawi 12 hnehna an chang a, Belgium in vawi 5 hnehna changin vawi 5 dang an inhnehtawk.
Portuhal hnawtchhuaktu Spain team an dam kim a, hliam tharlam an nei lo. Belgium lakah an that theih dan ang berin an inlan thei dawn. Team tha Portugal lakah pawh Tikitaka Modern khelhchhuak thei team tha tak an ni a, Belgium lakah hmuhnawm takin an inlan leh tura ngaih a ni. Spain mual lai player Rodri leh Pedri te an hmuhnawm em em a, No. 10 position luahtu Dani Olmo a hlauhawm a, rawlthar Lamine Yamal pawh Ar ven tak ven reng ngai, theihna nei sang em em a ni. Vei lamah Nico Williams a chhawr theih tawh dawn niin a lang bawk. Midfielder leh forward an neih that em em bakah an tlarhnung a phui tha a, Pau Cubarsi leh Laporte an inkawp fuh a, Marc Cucurella a dingnghetin a hmuhnawm em em bawk a, Pedro Porro a tlo tlut rih bawk.
Belgium hi an midfielder pawimawh Amadou Onana a inhliam a, an chhawr thei dawn lo. Onana awm lo hi Youri Tielemans tan a khingbai thei viau dwn. Tlar hma lamah Romelu Lukaku nekchhuah zawh loh Charles de Katelaera a chetha a, Leandro Trossard te nen an inkawp an hlauhawm viau. Manchester City winger Jeremy Doku erawh chu beisei angin a la khelchhuak thei hlei lo thung. Belgium coach Rudi Garcia a huaisen a, Kevin de Bruyne, Doku leh Lukaku te pawh bench-ah a dah ngam. A huaisenna hi team in a hlawkpui rih viau.
Spain leh Belgium te inkhel tur hi inkhel hmuhnawm tak a nih ngei a rinawm.