Zverev-a’n Fritz a hneh

Wimbledon khelh mekah French Open champion Alexander Zverev a khelh tha chhunzawm zel a, Taylor Fritz hnehin a vawi khat nan semi-final a lut. Zverev hian beisei phak baka khel tha Arthur Fery a hmachhawn zui leh ang.
Wimbledon 2026 ah champion tura rinkai pahnihna Zverev hian quarter-final-ah tunhnaia a hneh theih loh Taylor Fritz a hmachhawn a, semi-final a luh zawh loh mai a rinawm hman hle. Mah se Fritz hian a khup a tina a, a khel hleithei meuh lo. Hliamin a tihbuai Fritz lakah Zverev hian a theihtawp a chhuah a, chak theihna hun tha a neih pawh belh a tum lo.
German Zverev hian dam chiang lo chunga inlan Fritz lakah break vawi khat a nei thei hram a, game li hloh chungin set khatna a la. Set hnihnaah pawh break vawi khat a neih a chhawr tangkai zui leh a, game li bawk hloh chungin set a la zui leh. Set hnih a lak zawn hnuin set thumnaah a khel tha leh zual a, game hnih a hloh a, Fritz lakah 6-4 6-4 6-2 a hnehna changin Wimbledon-ah a vawi khat nan semi-final a lut ta a ni.
Zverev hian tunhnaiah American Taylor Fritz a ngam lo viau a, an intum hnuhnung vawi sarihah a tlawm vek a, heah to head ah 10-5 in a hnufual mek bawk. Tunhnaia a hneh thin hmachhawn a nih vangin Fritz ngei pawh hian semi-final a luh leh mai a ring hle. Mah se, khup hliamin a tibuai ta si a, a lawn theih thina Zawngtah kungah a lawn thei ta lova, Wimbledon atangin a tla ta a ni. Fritz laka chak ve ta nawlh Zverev hian Fery a hmachhawn zui leh dawn.
British qualifiler Arthur Fery hian quarter-final-a a khingpui Flavio Cobolli chu 6-4, 7-6 (7-4) 6-0 in a hneh a, inlehthalna lian thlentirin semi-final a lut nawlh.