Spain in bul an tan tha

July 20 a Hmeichhe World Cup khelh tan takah champion tura rinkai zinga mi Spain chuan tha takin bul an tan a, an khingpui Costa Rica chu si thum faiin an hneh nghal. Spain chak rual hian Switzerland pawhin hnehna an chang a, Nigeria leh Canada an inhnehtawk ve thung.
Champion tura rinkai zinga mi Spain hian World Cup thlengtu pakhat zawk New Zealand-a Wellington Regional Stadium-ah Costa Rica an hmachhawn a, harsatna lian tawk lovin point thum an hmu. Spain hian South American team lakah bul an tan tha a, na takin an khingpuite an nawr nghal chat. Na taka an khingpuite an nawr hi an chhawr tangkai thuai a, minute 21-naah goal an thawkchhuak. Minute 21-naah hian Costa Rica player Valeria Del Campo chuan an lamah a ti-goal a, Spain hmahruaina goal a thun sak.
Valeria Del Campo goal vangin Spain an phur thar hluai a, goal dang an thun belh leh thuai bawk. Si khata hma an hruai hnuin na zual zawkin an khingpuite an nawr a, hma an hruai atanga minute hnih hnu lekah Aitana Bonmatí chuan an goal hnihna a thun zui leh nghal zat a, an hmahruaina a tizau.
Inhnaih chilh taka goal hnih an thawhchhuah hnuin Spain an khel bon zui zel a, goal an thun belh leh thuai. Minute 27-naah Esther González chuan an goal thumna a thun a, darkar chanve an khelh tlin hmain goal thum an thun hman der tawh. An khingpuite an chungtlak hneh em vangin Spain hian hnehna lian zawk sualchhuakin, an khingpuite an sawp zui hle tura ngaih a ni hman.
Si thum fai ngawta an hnufual hnuin Costa Rica hian an si phurh sut then theihna hun remchang an nei a, minute 34-naah penalty an hmu. An goal thun theihna hun tha hi Hermoso chuan a hloh a, hun tawp thlengin goal an thun theih loh phah. Spain pawhin hun tawp thlengin goal an thun thei tawh bik lova, 3-0 in an chak zui ta a ni.
Zirtawpni a inkhel dangah Switzerland chuan Dunedin Stadium-a an khingpui Philippines chu si hnih faiin an hneh a, point thum an hmu ve bawk.
Switzerland hian World Cup-a hmel thar Philippines lakah goal an thun thei mai bik lo. Goal an thun theih lawk loh hnuin chawlhlawk dawn hnaih minute 45-naah penalty an hmu hlauh a, he penalty hi Ramona Bachmann chuan a pet goal a, hmahruaina goal a thun. Chawlhlawk hnu lamah Switzerland an khel tha chhunzawm a, minute 64-naah Seraina Piubel chuan an goal hnihna a thun a, point thum an hmu zui ta a ni.