Mo tana nu te nen boruak tha neih dan

Kan chhungte la ni ngai reng reng lo te inah kan lawi a, engtik lai maha ‘Ka nu/ ka pa’ kan la tih ngai reng reng loh te chu kan nu leh pa te an lo ni ta. Hetiang hunah tak hian, a bikin mo leh a pasala nu te inkarah engemaw tak a awm duh hle a, thawk leh khata inpawh nghal mai theih a ni bik lo, chuvangin relationship lama mithiam te chuan mo tan a nu thar nena boruak tha siam dan tur ti hian an sawi a:
1. I nih loh pui anga lan tum suh. I pasal chu a nuin a veng rilru ran dawn a, a fapa nuna hmeichhe thar i nih vangin uluk takin a thlithlai dawn che. A fapa tan a tha ber a duh vang chauh a ni. Chuvangin lem chang suh, nu chuan a hrethiam thuai dawn tho, chhungte tih lawm tum luat vangin i nih loh anga lan tum vak kher suh, a daih rei dawn chuang lova, a hnua boruak tha lo siamtu mai a ni thei.
2. Zâm chhe lutuk suh. Mo thar lai chuan nervous te pawh hi thil nihphung lo a ni chuang lo. Mahse, engkimah over si lovin confi’ takin awm la, i nu thar hmaah chuan khup dui chuang suh. Nervous nasat luat vang tum loh deuha awm theih a nia, fimkhur ang che.
3. Mothar tirh chuan thusawitu berah tan tum loh tur a ni a, a ngaithlatu a tan thiam zawk tur a ni. A ngaithlatu tih vanga engmah sawi ngai lo, mo ngawi reng, nih erawh a fuh leh chuang lo. Midang chhuahchhal zawnga tawng chhuah a fuh lova, inhauhna thlen thei boruak chu tlansan zel tur.
4. Incheina uluk rawh. Kum upa deuh chuan thawmhnaw tawngchham lutuk leh langtlang lutuk te an mo inbel atan an duh vak lo maithei, chutiangin make-up pawh a tawk hriat a tha.