Spain in World Cup 2026 an hnaih

Inrinni zan khan Europe khawmual atanga World Cup 2026 khel tur zawnna neih chhunzawm a ni a, Mimualah 4-0 a hnehna chang Spain in World Cup an khel ngei dawn tih a chiang thawkhat tawh. Spain an chak lai hian Belgium an chak zo lo thung a, World Cup khelh tura an tlin hun tur tihkhawthlai hret a ni.
Group E hmahruaitu Spain hi Georgia hmachhawn turin Boris Paichadze Stadium-ah an leng lut. Mikhual an nihna hmunah an khel tha viau a, si li fai ngawtin hnehna an chang. World champion hlui leh Europe champion ni mek Spain tan hian inkhel tan atanga minute 11-na lekah penalty an hlawhchhuak nghal. He penalty hi Mikel Oyarzabal chuan a pet goal a, hmahruaina goal a thun.
Hma takah goal an thun vangin Spain an phur a, inrintawkna sang zawk nen an inlan chhunzawm. Ball chang tam zawk leh hlauhawm siam tam zawk Spain tan hian Arsenal midfielder Martin Zubimendi chuan minute 22-naah an goal hnihna a thun zui leh a, an hmahruaina a tizau. Zubimendi goal thun hnuin Ferran Torres chuan minute 34-naah an goal thumna a thun zui leh a, 3-0 a hmahruai chungin chawlhlawk an hmang.
Chawlhlawk hnu lamah Spain an khel tha chhunzawm a, goal hmahruai thuntu Mikel Oyarzabal chuan minute 63-naah an goal lina a thun zui leh a, an chakna a nem nghet. Oyarzabal goal thun hnu hian hun tawp thlengin goal dang a luh belh thei tawh lova, Spain chuan mikhual an nihna hmunah phu taka hnehna changin point thum an hmuh belh a, Group E-ah hma an hruai chhunzawm.
Group E-a inkhel dangah Turkey chuan an mikhual Bulgaria chu penalty atanga Hakan Çalhanoglu goal thun leh Atanas Chernev own goal hmangin an hneh a, point thum an hmu ve bawk.
Group E-ah hian khelh nga atanga point 15 hmuin Spain in hma an hruai chhunzawm a, an hnuai chiaha awm Turkey nen point thumin an inthlau mek. Spain leh Turkey te hi thawhleh zan hian an inkhel zui leh dawn bawk. Spain hi an mikhual Turkey lakah an chak lo a nih pawhin si 14 aia tlema an tlawm a nih chuan group champion an ni zui dawn tho a. World Cup an khel ngei dawn tih a chiang tawk viau tawh. Turkey muala chak tawh an nih vangin Spain hian an mualah hnehna chang turin inrintawkna sang tak an nei dawn a, chak mamawh Turkey tan hneh an har khawp ang.
European champion Spain hian vawi 5 khel tawhin goal 19 zet an thun a, goal chhuah an la nei lo. Goal 19 ngawt thun a, goal an la chhuah miah lo hi an thatzia tilang chiangtu a ni. Sevilla mualah Spain hmachhawn tura lenglut tur Turkey hian hnehna an chang zo lo a nih pawhin an hnuai chiaha awm Georgia tan umphak theih an ni tawh lova, play-off khelin World Cup khelh phak theihna hun remchang an nei zui leh thei dawn.
Kazakhstan in Belgium an chelh
Inrinni zana inkhel dang; Group J atanga inkhelah Kazakhstan in Belgium an chelh a, 1-1 in an inhnehtawk. Kazakhstan lakah an chak zawh loh vangin Belgium hi group champion ni lo thei dinhmunah an ding thar leh.
World Cup 2026 khel phak tura chak mamawh Belgium hi an mualah 6-0 ngawta an lo hneh tawh Kazakhstan hmachhawn turin Astana Arena-ah an leng lut. Mimualah inkhel tur ni bawk mah se hnehna chang nawn leh turin an inringtawk hle. Inringtawk viau mah se goal chhuah hmasa zawkah an tang teh tlat a. An si phurh an sut naa hnehna erawh an chang thei bik lo thung.
Kazakhstan tan hian Dastan Satpaev chuan inkhel tan atanga minute 9-na lekah hmahruaina goal a thun. Hma takah goal an thun vangin an phur viau a, team lian lakah an indang ve thei zel a, 1-0 a hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah Belgium in goal an thun ta thuai thung. Second half tan atanga minute thumna lekah Hans Vanaken chuan goal thunin an si phurh a sut. Mikhual an nihna hmunah chak ngei tumin an inlan a, mualneitu an nawr ber deuh reng. Minute 79-naah mualneitu player Islam Chesnokov hnawhchhuah a ni. Tam zawk ni bawk mah se Belgium hian goal an thun thei lo tluang a, chak an mamawhna inkhelah uiawm takin an chak zo ta lo a ni.
Group J-a inkhel dangah minute 61-naa Jordan James goal thun hmangin Wales in mualneitu Liechtenstein an hneh a, point thum hlu tak an hmu. Mimualah an chak vangin Wales hian World Cup khelh phak beiseina thar an nei. Group J-ah hian hmahruaitu Belgium in point 15 an hmu mekah point 13 ve ve hmuin North Macedonia leh Wales ten an dawt.
Thawhleh zan hian Belgium in Liechtenstein an mikhual dawn a, an mualah an chak a nih chuan group champion niin World Cup khel turin an tling ang a. An mualah an tlawm a, Wales leh North Macedonia te inkhelah chak zawk an awm a nih bawk si chuan a chak zawk zawk Group champion a ni daih dawn thung. Thawhleh zan hian Group J te chin fel an ni dawn a, inkhel hmuhnawm tak an lantir ngei a beiseiawm.