Special School zirlai leh larsap inkawm

Special School zirlai leh larsap inkawm
Larsap Gen. Vijay Kumar Singh (Retd) chuan Ningani khan Shalom Special School Serchhip zirlaite chu Lok Bhavan Aizawlah a kawm.
Shalom Special School zirlaite hian Serchhip Battalion Assam Rifles buatsaihin April 13-23 chhung hian Aizawl, Silchar, Shillong leh Cherrapunji tlawhin Study Tour an nei a ni.
Larsap chuan Assam Rifles-in Shalom Special School zirlaite khawhawi tizau tur leh, school hungchhung piaha tawnhriat an neihna atan tia study tour an buatsaih chu lawmawm a tih thu a sawi a. Zirlaite hmangaih taka enkawl thintu zirtirtu leh nu leh pate chhuanawm a tih thu sawiin, tour chuan an school leh zirlaiteah hmasawnna rah duhawm tak a thlen ngei a beisei tih a sawi. Assam Rifles hotute chu an theihna zawn apiangah Shalom Special School ngaihsaka chhawmdawl zel turin a chah.
Shalom Special School zirlaite hian larsap hnenah thilpek an hlan bakah study tour chu nuam an tih thu an thlen a. An school chungchang leh tour hlimthla thlirho a ni.
Shalom Special School Serchhip hi 2005 August 17 khan chief minister hlui Pu Lal Thanhawla’n a din a. Tuna an school building ni ta sakna tur lungphum hi Mizoram larsap hian Eastern Army Commander a nih lai, January 2010 khan lo phum sak tawhin, 4 Assam Rifles-in Military Civic Action kaltlangin an sak sak a ni. Tunah hian vohbik zirlai 36 an awm mek.