Sports hmasawnna tur sawipui

Sports & Youth Services minister Lalnghinglova Hmar chuan Thawhtanni khan larsap Gen Vijay Kumar Singh (Retd) chu Raj Bhawan-ah hmuin Mizorama sports hmasawnna tur an sawi dun.
Larsap chuan Mizoramin infiamna lama theihna a neih thu leh football avanga a hmelhriat thin thu sawiin, “Football piahlamah hma sawn theihna sang tak Mizoramin a nei,” a ti a. Union Sports minister a lo biak tawh thute, Mizoramin Vision Olympics 2036 a neih avanga lawmawm a tih thute a sawi a, sipai lamah pawh a tul anga thawhpui tur a lo zawn tur thu a sawi bawk.
Minister chuan Mizoramin infiamna lama hma a lakna kawngah state flagship programme ‘Bana Kaih’ hnuaiah Empowering Mizoram Sports an kalpui dawn tih a sawi a. Thingtlang hrut chhuaka sports lama talent zawnchhuah hna kalpui tura ruahmanna an neih dan larsap hi hrilhin, Mizoram hmathlir tihpuitlin kawngah theihtawp chhuahpui turin a sawm. A tawn hriat pawimawh leh hnathawh tawhna chu Mizoramin a chhawr tangkai ngei a beisei tih a sawi bawk.
Excise & Narcotics minister ni bawk Lalnghinglova Hmar chuan ruihhlo do kawngah sports a tangkai a, eizawnna a ni chho mek tih a sawi a ni.