Sports leh skill development kaihkawp tumin minister-in centre hotute a dawr

Sports leh skill development kaihkawp
tumin minister-in centre hotute a dawr
New Delhi-a kal Sports & Youth Services minister Lalnghinglova Hmar chuan Thawhtanni khan Union minister for Youth Affairs & Sports Dr Mansukh Mandaviya a hmu a, Mizoram-in sports leh skill development kaihkawp a tum dan leh football infrastructure tihhmasawn dan tur an sawi dun.
Mizoram Sports minister hian sports coaching leh training chu skill inzirtirna pawimawh tak a nih angin, skill development leh sports kaihkawp tumin hma an la tih a sawi a. Hemi atan hian Ministry of Skill Development & Entrepreneurship hnuaia Sports, Physical Education, Fitness and Leisure Skills Council (SPEFL-SC) kaltlangin project thehluh a ni a, MSDE minister leh secretary bakah SPEFL-SC CEO te nen pawh an thlirho tawh tih a hrilh.
Union minister leh Mizoram minister hian project proposal an thlirdun nghal a. Dr Mansukh Mandaviya hian pilot project anga kalpui thuai theih nise a duh tih sawiin, MSDE minister Jayant Chaudhary a lo sawipui tur thu a sawi.
Sports leh skill kaihkawp chu Mizoram sawrkarin Olympic 2036 Vision a neih denchhena kalpui tum a ni a. Coach-te tan training of trainers buatsaih, sawrkar school-a physical education zirtirtute training peka physical education mumal taka kalpui, state pum huapa naupang zawkte tan sports coaching leh talent zawnchhuah kalpuite a tel a ni.
Hmarchhak leh Mizoram-in sports lama hma a sawn theihna turin corporate liante inthlunzawm a tha tih Lalnghinglova Hmar hian a sawi a. Union Sports minister hian hma a lakpui tur thu a hrilh a ni.
LESDE minister ni bawk Lalnghinglova Hmar hian MSDE secretary Atul Kumar Tiwari pawh hmu in, sports leh skill development kaihkawpna tur project proposal-a belh leh siamthat ngai lai an sawidun a ni.