MNF hotute CBI chhui tir turin ZPM sawrkar ka ngen – Robert Romawia

MNF hotute CBI chhui tir
turin ZPM sawrkar ka ngen
– Robert Romawia
ZPM-in an sawrkar hmaa MNF sawrkar hotute an puh thinna zawng zawng chu tunah chhui tir turin a ngen tih MNF MLA Robert Romawia Royte chuan a sawi a. Chutihrualin ZPM sawrkar hnua puh an nihna pawh chhui tir tel ve turin a ngen tih a sawi.
Thawhtannia MNF office-a inkhawmah MNF Thalai president ni bawk Robert Romawia Royte chuan, ZPM sawrkarin CBI an thu thua mi chhui theihna an pek uk chu reiloteah an sut leh tih a sawi a. ZPM-in MNF sawrkar nasa takin an puhchhe thin tih a sawi bawk.
“Mipuiin thudik an hriat theihnan MNF sawrkara CM, minister-te leh MLA-te hi, kan kut phuar a nih lai hian ZPM sawrkar hian CBI kolutin min chhui vek se. Chutiangin CBI hian ZPM sawrkar hnuaia SASCI project-a utilisation certificate dik lo siam chungchang, sawrkar empanelled firm-te hmunphiah lei leh hralh dan, open tender chhang hniam ber pe loa a chhang sang ber pek daih dan leh a dangte hi chhui ve bawk se. Chutah chuan thudik a lo lang ang,” a ti.
Thalai zingah hnam rilru dik tak tuh thar a ngai tih MNF Thalai hruaitu hian a sawi a. Hnamah mi an chian chuan huai pawh an huai a, an zia a nghet a, hmasawnna hnathawh pawh a tluantlingin ram a dingchang thin tih a sawi.
MNF sawrkar kum 5 chhung lekin nationalism rah chhuah tam tak hmuh tur a awm tih a sawi a. A bikin ramri hnaih lamah, Assam leh Tripura lama lama ram chân laklet leh ram hauh tih nat hrang hrang an neih avanga Mizoram-in a hlawkpui mek chu ZPM sawrkar hnua hma an lak danah heng state thenawm hian min zuam thar leh hle tih a sawi.
“Ramria buaina a awmin, sawrkar a tawmim tlat thin vangin zirlai pawl leh thalai ralthuam keng loten state dang police ralthuam kengte kut lawngin an hmachhawn thin a. MNF a sawrkar atangin Police force hmangin ramri a veng a, hnam a chhan thin. Hnama chiang lo an sawrkar reng hi ram tan a him loa, MNF a sawrkar leh a tul,” a ti.