Assembly Session-a zawhna a chhan danah Sports & Youth Services minister chuan a department chan a hriatchian loh zia a lan bakah a rilru thianghlim lo tak a pu nia an ngaih thu MNF party chuan an sawi.
MNF Gen. Hqrs. thuchhuak chuan, Assembly Session-a zawh belhna a chhannaah Sports minister chuan RG Stadium-a phullem thar phah chungchang MSSC president a nih angin a hriatpui loh thu leh work order engmah awm lo anga a chhuanchhe zawnga zawh belhna a chhan dan atangin, a department chan a hriatchian loh zia a lan bakah a phenah rilru thianghlim lo tak a pu tih a chian thu a sawi.
‘RG Stadium-a phullem hlui tawh chu AIFF-in national level competition khelhnan a pawmloh thu August 2023 velah hriat a ni a, nasa takin football association / club leh thalaite an mangang a. Hetihlai hian Lunglei Zobawka phullem phah tur chu National Green Tribunal (NGT) in a phal loa, a hmuna phullem dah pawh a rem ta lo a. RG Stadium-ah hmanhmawh taka mamawh a nih bawk si avangin SYS department thutlukna angin RG Stadium enkawltu – SYS director chu Zobawk atanga RG Stadium-a suan mai turin ziakin hriattir a ni a, Zobawka phah tura ruat sa M/s Decor India Ltd tho chuan RG Stadium zawkah an phah ta a ni,’ a ti.
Hetianga ruahmanna siam a nih takah chuan NGT-ah Zobawk Sports Academy case a fel veleha phullem phah leh nghalna tur sum pawh MNF sawrkar khan a ruahman thlap tih sawiin, ‘RG Stadium-a phullem phah hi sawrkar order anga tih a ni a. SYS minister thar hian infrastructure siambelh lama hma lak nat a tum loh thu a sawi fo hian Mizo thalaite rilru a tina a, a tih nasat theih a rin loh vanga ‘intlawhkhalh lawk nan a ti ta mai zawk em ni, tih hi mipui zawhna a ni,’ thuchhuah chuan a ti.
Sports minister-in a chan a chiang lo – MNF
Get real time updates directly on you device, subscribe now.
Prev Post