Spurs captain Romero contract thar

On Aug 20, 2025 6 0

Spurs captain
Romero contract thar
Tottenham Hotspurs captain thar Cristian Romero chuan kum li dang White Hart Lane-a khawsa chhunzawm leh turin contract thar a ziak.
Kum 2021 August thlaa Atalanta chhuahsana north London a thlen hnu khan Argentina centre-back hian Spurs tan match 126 khel tling tawhin, kum 27 mi hi a tirah chuan loan-in an senglut phawt kha a ni a, a kumleh nipui thawt laiin an lei nghet a, a nghet zual zel a nih hi!
A club vawn lai tana goal venhim lam a thawh rualin goal pawh tum riat zet a khung ve tawh a; Europa League final-a Tottenham-in Manchester United hneha kum 17 chhunga an trophy hmasaber an sualchhuah tum khan captain a ni hman tawh bawk.
Tun nipui bazar boruakah Atletico Madrid nena sawizawm ni ve hman thuak thuak bawk mah se head coach thar Thomas Frank chuan club captain-ah a puang a, kum 2029 thleng north London-a cham zui turin contract thar a ziak zui ta hial a ni.
Romero chuan Europa League an lak hlim khan Spurs-a a hlim em em thu sawi chungin season thar chu ‘special season’ a nih tur thu a sawi a, “Hnehtu nih kan duh a, tun season ang bawk hi kan tawnbuak leh lohna tur chhan engnge awm. Club tana trophy dang lak leh chu kan zavaia tana pawimawh a ni.
“Ka tan chuan he club hi khawvela tha ber a ni. Chawlhkar liamta hnuhnung pahnih kha ka tan chuan a hlu zual a, a hmasa zawkah captain atana ruat ka ni a, tunah contract thar a lo ni leh a, ka tan chuan thutlukna duhawm tawp thang a ni,” tiin a tunlai boruak tawn a sawichhuak.
Belgrano defender hlui hian a contract neih laiah kum hnih hmabak a la nei a, nghet lehzualin Tottenham-ah a inthlung zui ta a ni.
Right-back Djed Spence pawhin long-term contract a ziak ve bawk.
Kum 25 mi hian kum 2022 khan Middlesbrough atangin Tottenham hi a zawm a; a Spurs career a duhawm lo a, loan-in Rennes, Leeds leh Genoa lamah an theh phar a; season liamta khan boss bang ta Ange Postecoglou-a hnuaiah player pawimawh a rawn ni chho ta a; match 42 khelin goal hnih a thun hial a ni.
Spence-a contract neih lai hi kum 2028-a tawp tur a ni.