Spurs captain Romero season a tawp fel ta!

Hliam avangin Tottenham Hotspurs captain Cristian Romero chu tun season-ah a inkhel thei tawh dawn lo!
Premier League game-a si khat faia mualneitu Sunderland an hneh loh tum khan a khup a tina a, hun tawp hmain lakchhuah a ni a; Pathianni Stadium of Light-a goalkeeper Antonin Kinsky nena an insutna lama a hliam dinhmun an endiknaah tun season-a khelmual leh leh thei tur chi a ni lo tih nemngheh a ni.
Argentina defender Romero hian inelna hrang hrangah belkhkhawmin Spurs tan game 155 a khel tling tawh a; tuntum a hliam avang hian chawlhkar riat vel a chawlh dawn avangin kumin World Cup-ah pawh hian ram tan a inlan thei dawn em a chiang rih lo.
Kum 27-a upa Romero hoin tun season Premier League lamah Tottenham an talbuai a, tunah hian league table-ah 18-na niin, khelh 32-ah point 30 lek hum chungin tlakhniam theihna hmun pawnlang ber an luah mek a, khelh ruk an la neihah hian an defender pawimawh leh khelmual chhunga an hruaitu ni bawk Argentine tel loin inhamtang zo tak ang maw?!
Romero a chhawr thei lo tur hi head coach thar Roberto de Zerbi tan engtia pawi nge a nih dawn a la chiang chiah lo a, top flight-a inhamtanpui a tumna kawngah tlarhnung vengtu tha dang hmu zo tak ang maw?
De Zerbi chuan Sunderland an hneh loh hnu khan Romero chu rilru paukhauh leh lian zet mai a nih thu leh Spurs tana player pawimawh a nih thu a sawi a, chuti taka a player pawimawh a chhawr thei lo tur chu drop zone-a tang mek north London club tan chhiat mekna atanga chhiat lehzualna a nih mai hmel!