SRDC Act tihlawhtling turin Paite-ten sawrkar an ngen

SRDC Act tihlawhtling turin
Paite-ten sawrkar an ngen
MNF-in 2018 MLA inthlan hmaa an tiam tawh leh chief minister Pu Zoramthanga’n vantlang hmaa a thusawinaa a lo tiam tawh angin, Sialkal Range Development Council chu act-a dah ngei turin an ngen tih Paite Tribe Council chuan an sawi.
Paite Tribe Council (PTC) thuchhuak chuan Mizoramah Paite chu Zohnahthlak zinga hnam bil lian tak ni mah se, a hlang deuha an chenna chu Sialkal tlangdung leh Champhai district-a khaw thenkhat a ni deuh mai a, a bika chawikan ngai tak an nih avangin India sawrkar pawhin rei tak an dil hnuah 2003 January 8 khan scheduled tribe list-ah a telh a. India Danpui – Sixth Schedule chhunga inrelbawlna hi Lai leh Mara bakah Hmar-in thisen chhuak khawpa an beih hnua Sinlung Hills Council an neih hnu ah pawh, Paite chuan tharum leh helna hmanruaa hmang loin an dil thin a, tihhlawhtlin sak an la ni lo ta reng thung tih a sawi a ni.
Mizorama chengte inlungrualna chu tha tiin, mahni hnam bil chauh ngaihtuah loin, an mamawh hmasa ber socio-economic development nei tura hmalakna atan 2012 Februaury 24-ah Paite hnam chen hlang deuhna chawikan a nih beiseiin, khatihlaia sawrkarna chelhtu Congress chuan Sialkal Range Development Board, a hnua Sialkal Range Development Council (SRDC) tia thlak chu a area-a bialtu MLA chairman-na hnuaiah din a a ni tih a sawi.
‘Board a ni emaw Council a ni emaw sawrkar notification maia chhuah a nih avangin a nghet tawk lo e, tiin Act-a min dah sak turin beiseina sang tak nei chungin sawrkarah kan thlen a. Tuna sawrkarna chelhtu MNF hian 2018 October 22-ah inremna (MoU) min siampuiin, SRDC tihpuitlin nan hma min laksak tur thu an ziak a. Tuna chief minister hian Mimbung khuaa 2020 February 21-a SRDC office tur a hawn tumin SRDC hi Act-a tihngheh sak kan nih tur thu a sawi a, lawm takin kut kan lo ben hnan tawh a ni,’ PTC chuan a ti.
Beiseina nen an thlir laiin 2023 July 31-a Council of Ministers thukhawm ngaihtuah zíngah SRDC Bill chungchang telh a nih laiin, an beisei anglo takin, la zirchian tur, tiin pawm zingah a tel lo tih an hriatin an rilru a na hle tih a sawi. ‘A siamthat ngai lai emaw pawh sawrkar hotu leh official-ten min hrilh bawk si loh avangin hriatthiam har kan ti hle. Kumin MLA inthlan puan hma ngeiin sawrkar hian kan ngenna min tih hlawhtlinsak kan beisei a ni,’ a ti a. An hmalakna hi SRDC huamchung mipui pawhin an thlawp a. PTC Unit, Village Council leh NGO ten an thlawpna signature an dawng tih PTC hian a sawi bawk.