State 12 leh UT parukah e-roll SIR kalpui tan
State 12 leh UT parukah e-roll SIR kalpui tan
Chief Election Commissioner Gyanesh Kumar-a chuan Thawhtanni khan ram puma kalpui tur, Special Intensive Revision (SIR) chu state 12 leh union territory parukah kalpui tan tur a puang.
Thawhlehni atanga tanin February 7 thleng awh tur a ni a. SIR kalpui thawh hnihnaah hian inthlan hmabak state leh UT – Tamil Nadu, Kerala, West Bengal leh Puducherry-ah pawh neih a ni dawn a. Nakuma inthlang tur tho, Assam-ah erawh National Register of Citizens (NRC) kalpui mek a nih avangin la tih a ni ve dawn lo.
Election Commission chuan SIR thawh hnihnaah hian voter vaibelchhe 51 vel tihthar a ni dawn tih a sawi.
Inthlan buaipuitute hian state 12 leh UT paruka voter list chu Thawhtanni zan khan khawih chet theih loh turin a ti nghal a. Hengte hi Andaman & Nicobar Islands, Chhattisgarh, Goa, Gujarat, Kerala, Lakshadweep, Madhya Pradesh, Puducherry, Rajasthan, Tamil Nadu, Uttar Pradesh leh West Bengal te an ni.
Electoral roll SIR hi Election Commission-in voter list a tihthar (update)-na a ni a. Voter pem te, hmun khat aia tama vote nei te, voter thi tawh leh dik lo taka ram dang mi telhte paih leh siam thatna tur a ni.
Vote nei thar thun an ni bawk ang a, thi tawh paih rualin insawnte pawh an awmna thara dahna atana tih a ni a. Election Commission chuan voter list hi inthlan dawn apiangin emaw, a tul angin emaw a ennawn thei a ni.
Voter list dik lo palh emaw, hmun khata awm nawn emaw pawh paih a ni ang.
SIR kalpui hnuhnung ber chu kum 21 chuang kal ta, kum 2002-2004 inkara tih kha a ni.
Election Commission chuan SIR thawh hnihna atan hian a buaipuitu turte training chu Thawhlehniah tanin November 3 thleng a awh dawn a. In tin luta en fel hna chu November 4 atanga December 4-ah tih turin a ruahman a, December 9-ah draft electoral roll tihchhuah a ni ang.
Draft-ah hian duh loh nei emaw, lawm lohna nei emaw chuan December 9 atanga January 8 thleng sawi buai theihna an nei ang a. Hengte hi December 9 atanga January 31 thleng ennawna ngaihtuah a ni ang a, final electoral roll chu February 7-ah tihchhuah a tum a ni.