Mizoram chu hmarchhak state zinga state lian leh mipui tamna ber ni lo mah se, entawntlakin kan siam thei tih chief minister Zoramthanga chuan a sawi.
North Eastern Council kum 50 tlin, Golden Jubilee lawmna kal mekah Thawhlehni khan Aizawlah hun hman a ni a. Hmanpuitu chief minister chuan NEC chu Pathianin malsawmna min pek a ni, tiin, tungnung a, tichangkanga kalpui zel turin mipui a sawm. India hmarchhak state-te tan sawrkar laipui chuan a bikin sum a sanction thin a, hmasawnna sum thalna khurbik kan nei, tih chief minister hian sawiin, “NEC vang hian Mizoram leh hmarchhak state-ten kawng hrang hrangah hmasawnna kan neih phah hi a lawmin a ropui em em a ni. North East state ho zingah state lian ber leh mipui tam berna ni lo mah ila, state dangte entawntlakin kan siam thei a ni,,” a ti.
Mizoram chu lehkhathiam rual awmkhawmna, khawtlang inpumkhat leh tanrualna ram a nih angin, state dangte tan rinawmna leh inhmangaihna kawngah te, tlawmngaihnaah te entawn tura awm zel a, hmahruaituah tan tum turin Zoramthanga chuan state mipui a fuih a. Tunah pawh remna entirna’n state ralmuang ber kan ni, tiin, kawng tinrengah entawn turin theihtawpa bei zel turin mipui a sawm.
State Planning Board vice chairman H Rammawi pawhin thu sawiin, India sawrkar chuan hmarchhak state-te hmasawnna atan kumtin kan ta tur bik sum leh pai a dah hrang a, hamthatna kan dawn theih nan NEC leh DoNER ministry min siamsak tih a sawi. Mizoram leh hmarchhak state-te tan chuan North Eastern Council chu a hlu hle tih a sawi bawk.
Golden Jubilee hi NEC hmunpui Shillong-ah Prime minister Narendra Modi hoin 2022 December 18 khan lawm tan a ni a. Hmarchhak state hrang hrangah lawm zui mek a ni.