State inthlang tur BJP-te tan enchhinna pawimawh

On Oct 11, 2023 10 0

State Assembly panga inthlang tur – Madhya Pradesh, Rajasthan, Chhattigarh, Telangana leh Mizoram te chu kum 2024 inthlanpui awm tura BJP te ideas leh issues ngaih pawimawh ten ngaih pawimawh an hlawh leh hlawh loh lantirna tur anga ngaih a ni.
Heng state-a candidate tur kimchang BJP te hian an la tichhuak lo chungin a then erawh an tichhuak tawh a. Madhya Pradesh leh Rajasthan-ah chuan MP ni lai mek te an awm nuk thung.
Madhya Pradesh-ah chuan Union minister pathum – Narendra Singh Tomar, Faggan Singh Kulaste leh, Prahlad Singh Patel bakah Lok Sabha MP pali – Rakesh Singh, Ganesh Singh, Reeti Pathak, leh Uday Pratap Singh te pawh candidate turin an tel a. Rajasthan-ah chuan Lok Sabha MP te Rajyavardhan Singh Rathore, Diya Kumari, Baba Balaknath, Bhagirath Choudhary, Devji Patel leh Narendra Kumar, bakah Rajya Sabha MP Kirodi Lal Meena te an candidate dawn bawk a ni.
Hetianga Lok Sabha MP ni lai mekte candidate-a an dah dulna chhan hi anti-incumbency Shivraj Singh Chouhan sorkar Madhya Pradesh-a boruak a awm loh nana tih a nih piah lamah State leader te lungrual zawka siam tumna tia sawi a ni a. Tuna BJP tena strategy an neih hian kum 2024 Lok Sabha inthlana seat an semdarh dan tur thui takin a nghawng dawn nia ngaih a ni bawk.
Tun inthlang tur state-ah hian Bihar sorkarin caste survey an neih leh BJP tena an chhanna chuan awmzia thuk tak a nei tura ngaih a ni bawk a. A bik takin Hindi tawng hman tamna Madhya Pradesh, Chhattisgarh leh Rajasthan-ah te OBC te tamna ni bawkah chuan nghawng a nei thuk dawna ngaih a ni a. Rajasthan-ah chuan Chief Minister Ashok Gehlot chuan thlan tlin an nih leh chuan caste census an neih tur thu sawi chiang tawhin Congress Working Committee pawhin ram pum huapa caste census neih ngiatin chu tak chu BJP te tan chuan chona nasa tak a ni dawn a ni.
Telangana-ah chuan BJP te chuan State unit chief atangin Bandi Sanjay Kumar an paih a, a aiah Union Minister G. Kishen Reddy chu dah zawkin hei hi Kumar laka lungawilote thlem dam tumna nia ngaih a ni a. Hei mai bakah hian Bharatha Rashtra Samithi (BRS) atanga BJP zawm campaign committee chair atana an ruat chuan mitharin danglamna an siam thei dawn em tih enchhinna a ni dawn bawk a ni.
Kum 2018 inthlanah khan BJP te chuan Chhattisgarh, Rajasthan, leh Madhya Pradesh ah te an chak lo vek a. Kha inthlan result kha thingtlang lama awm loneitute lungawilohna lantirna anga ngaih a ni a. Khavang khan BJP te chuan loneitute tan income support programme Pradhan Mantri Kisan Samman Nidhi (PMKSN) an siam phah a ni.
Kumin kum tawp lama State panga inthlang tur hian an State theuha pawimawhna a neih piah lamah kum 2024 Lok Sabha inthlan hmelhmang lanna tur anga ngaih a nih avangin ngaihven a hlawh zual hle a ni.