Sawrkar laipuia TB natna venna lama hotu lu chuan Ningani khan Mizoram larsap Hari Babu Kambhampati chu a chenna Raj Bhavan-ah a hmu a. TB umbo tura sawrkar hmalakna a sawifiah.
Ministry of Health & Family Welfare-a Pradhan Mantri TB Mukt Bharat Abhiyaan, Central TB Division national consultant D Dharma Rao leh State TB Cell hotute chuan powerpoint presentation kaltlangin PMTBMBA hnuaia Mizorama hmalakna kal mek an sawifiah a. Larsap chuan sum thawhtu/ Nikshay Mitra of the TB Patient Nutritional Support program ni bawk chuan sum hmanga TB Natna veite chawtha hluitute chungah lawmthu a sawi.
“Mizoram chu kan la vannei a, TB vei pawh mi sangkhat chuang vel chauh kan la nih avangin tan tan lak deuh chuan, TB vei ei leh in tha mamawhtute hi kan pui vek theih a rinawm a. MLA te, mipui aiawh thlantlin body hrang hrang, college hnathawk leh sawrkar hnathawk dangte pawh he rawngbawlna huangah hian rawn lut zel turin ka ngen a ni,” a ti.
State TB Cell chu mipui kaihruaitu pawimawh kohhran hruaitute leh tlawmngai pawlte phungbawma sawm turin a chah bawk.
Tun dinhmunah Mizoramah TB natna vei, inenkawl mek 1321 an awm a. Heng zinga 989 hian chawtha leina atana tanpuina an mamawh a. Tun thlengin TB natna vei tanpuina atana Nikhshay Mitra program kaltlanga sum thawhtu hi mi 400 an awm tawh.
Nikshay Mitra program hnuaiah hian TB natna veite chawtha leina tur thawh duh tan tanpuina a thawh theih reng a. TB vei pakhat tana chawtha atana senso chu mi pakhat tan thlakhatah Rs. 650 anga chhut a ni.
Mizoram larsap hian TB vei mi 20 tan an chawtha leina tur sum a thawh mek a. Ram hruaitu zingah Health minister Dr R Lalthangliana, Home minister Lalchamliana te bakah MLA atangin Er H Lalzirliana leh Dr K Beichhua MLA te pawhin chhawmdawlna sum hi an thawh a ni. Lai ADC leh Mara ADC hotute zingah pawh he rawngbawlnaa tel an awm nual a. Sawrkar hnathawk zinga sum thawhtu zingah doctor an tam ber rih a ni.
State leh rampum TB vei dinhmun hrilh
Get real time updates directly on you device, subscribe now.
Prev Post
Next Post