State mamawh thlenin centre dawr

Lunglei High Powered Committee (HPC) vice chairman, V Malsawmtluanga, MLA chuan August 2-7 chhung khan Delhi-ah sawrkar laipui hotu thenkhat hmu in Mizoram tana thil pawimawh a thlen.
Ministry of Information and Broadcasting director Armstrong Pame, IAS; Ministry of Consumer Affairs, Food and Public Distribution joint director Lal Ramdinpuii Renthlei, IES; National Scheduled Tribes Finance and Development Corporation chairman -cum- managing director leh TRIFED (Tribal Cooperative Marketing Development Federation of India Ltd) managing director T Roumuan Paite, IRS; Ministry of External Affairs joint secretary B Vanlalvawna, IFS leh Border Security Force addl director general Puneet Rastogi, IPS te a kawm a ni.
I&B director hnenah hian Mizoram hmasawnna tura a ngaihpawimawh a sawipui a. Director hian Mizoram district thlan bik panga tan private company hmangin movie theatre /cinema hall an rawn sak theih tur thu leh chumi sak tan nan a hmunhma, tui leh power supply chu district administration-in an lo buatsaih lawk theih nan cheng nuai 30 theuh an pe lawk thei tih a sawi a ni.
Public Distribution joint director nen Mizoram hmasawnna tur sawi dunin, V Malsawmtluanga chuan Mizoram tan sum a tam thei ang ber hnuklut turin dawhthleng an lo buatsaih tur thu a hrilh.
TRIFED hotute chuan Mizorama hna an lo thawh tawh dan leh thawh zel an tum thu nen an inkawmnaah HPC vice chairman hi lo hrilhin, National Cooperative Development Corporation nen thawk dunin Mizoram Rural Bank kaltlangin mimal, society leh self help group ho loan tha chi an puktir dan leh puk theih dan, Mizoram bikah cheng vaibelchhe 50 vel loan a tih theih dawn thu an lo hrilh. Promoting Tribal Products Scheme kaltlangin Mizo kutthemthiamte deh chhuah an leisak theih thu leh chu’ng thil chu Tribes India Store-a an zawrh thin thu sawiin, Mizoram sawrkarin dawr a ngaihtuah theih chuan Tribes India Store hi Aizawla hawn an duh tih an sawi.
External Affairs joint secretary chuan Mizo/ India mi ram pawna hna thawk/ cheng mekten harsatna an neih changin ministry/ embassy kaltlangin an puih thin a; Mizo/ India mi ramdanga harsatna tawk reng reng an tanpui thei reng tih a lo hrilh a ni.
BSF hotu a kawmnaah Mizorama BSF hnathawh dan an sawi dun a. V. Malsawmtluanga hian a bikin Lunglei district-a an duty-na hmunah mipui nen inlaichinna tha zawk siam zel a, khawtlang tan Civic Action Programme kaltlanga nasa zawka mipui rawng bawl turin a ngen. Mizo/ hnam bil battalion din theih ni lo mah se, Mizoramah BSF battalion pali a awm avangin BSF-a tang Mizo sipaite chu battalion palia sem darh theih vek an nih thu hrilhin, Mizo sipaite Mizorama posting pe hram hram turin a ngen a, chu chuan tawng inhriat tawn loh vanga buaina leh harsatna tam tak a chinfel theih tur thu a hrilh a ni.