State ruling party atanga MP thusawiin awmzia nei mawh – MBJP president

Lok Sabha leh Rajya Sabha ah MP tha tak nei thin mah ila, sawrkar laipuia ruling an nih loh chuan an thusawi leh hmalakna in awmzia a nei mawh a, tun LS inthlanah BJP mi ngei MP-a neih a pawimawh tih BJP Mizoram president Vanlalhmuaka chuan a sawi.
Thawhtannia BJP Mizoram State-in an office-a political session an neihah Vanlalhmuaka chuan 2024 Lok Sabha inthlanah BJP sawrkar Modi kaihhruai chuan hneh takin sawrkarna a siam leh dawn a. Kan state retheihna ata khaichhuaha a awm theihna atan leh Mizo mipuiin tlangnel taka sawrkar laipui kan dawr ve theihnan, MLA inthlanpuiah BJP chu Mizoramin hnawl tawh mah ila, Lok Sabha inthlanah chuan Modi team-a tel ngei tur BJP MP thlang tura inbuatsaih a tul takzet tih a sawi.
“Mizoram hian MP Lok Sabha leh Rajya Sabha ah state-a ruling party atangin kan theh chhuak tawh thin a, central-ah an thusawiin awmzia a nei mawh hle. Mipui aiawha kan MP-te thusawiin awmzia a neih theihna atan Lok Sabha inthlan hi hmang tangkai turin mipui ka sawm a ni. Kan thlan fuh chuan central-ah Mizopa ngei Union minister kan nei thei a; state sawrkarna chelhtute tun aia Modi sawrkarah an tlangnel a, Mizoram mamawh central-a an zu sawite awmze neia lo umzuipui tur, state sawrkar sum harsatna ata chhanchhuah theihnan inbuatsaih turin mipui ka sawm a ni,” a ti.