State tin fan tumtuin Manipur luh tum
Thirsakawra India ram state leh UT tin fan chhuah tumtu Vanlallawmzuala Varte-in tunlaia buai mek Manipur tlan thlen ngei a tum a, October ni 22 kha Manipur luh a tum ni chu a ni.
Manipur-ah hian Zofate leh Meitei an indo a, Zofate tan Imphal khawpui chu him lova ngaih niin, Manipur-a Zo hnahthlakte pawh Imphal-ah hian an kal ngai lo. Lawmzuala pawh hi Imphal-a kal lo tura rawn a ni a, mahse Manipur a thlen loh chuan state tin a tlawh lo tihna a ni dawn si a, Imphal ni lo Manipur khaw danga kal turin remruatpui a ni ta a ni.
Manipur a thlen hma hian Nagaland a lut a, Kohima-ah October ni 21 khan chief minister Niphiu Rio nen an inkawm. Kohima-ah hian an chief minister adviser Lalthara’n a lo buaipui a, ani remruatpuinain Manipur-a Mao khua, Nagaland atanga Manipur hnaih khuaa riah a tum ta a ni.
Kohima hi October ni 18 khan a thleng a, tihian Manipur tih loh state leh UT dang chu a tlawh kim ta. A hmabak awm chhun Manipur a tlan thlen chuan Indian book of records-ah ziah luh a ni ang.
LZ-a tia koh Vanlallawmzuala Varte hian state leh UT tin tlawh chhuak turin January ni 25 khan Aizawl a chhuahsan a, boruak tihthianghlimna thu aupuiin ‘ride to clean air’ tih thupui a aupui kual a ni.
State leh UT hrang hrangah tha takin an lo dawngsawng a, an lo lawm thiam hle. Larsap a hmuh chang a awm a, chief minister a hmuh chang a awm bawk. Pollution Countrol Board lamin an lo lawm thiam thin a, state leh UT hrang hrangah Pollution Control Board hotute nen hian an inkawm thin. Mizo awmna khuaah chuan Mizote’n lo hmuakin an lo mikhual thin.
Kohima atanga Mao a pan lai, Thawhlehni tlai dar 3 vel thleng khan km 16310 vel a tlan tawh a, state leh UT a tlawh chhuah hian km 16350 vel tlan tura ngaih a ni.
“Hah em em lo a, ka hah hran lo e,” tiin a hah em tih zawhna a chhang a, “A chang chuan han hah deuh tum te chu a awm,” a ti bawk.
Chhunah leh zanaha tlan a, zan tlan hi a ngai fo. A riahna tur khua thleng tura zana tlan hi a ngai thin tih a sawi. Ni khata km 200 chuang a tlan chang te pawh a awm.
Khawvela lirthei thlen theihna hmun sang ber, Ladakh-a Umling la pawh LZ-a hian thirsakawr hian a inkhalh thleng.