Status quo chhungah Assam sawrkarin kawng an lai mek – MNF

Assam sawrkar chuan Mizoram nena ram inchuhna laiah kawng a lai leh mek a. Chutihlaiin Mizoram Home minister-in hma lakna a a awm hriat loh thu a sawi chuan Vairengte mipui rilru a ti na hle a, ngaihdam dil turin an phut tih tih MNF party chuan an sawi.
MNF 6th Serlui North Block thuchhuak chuan, kumin July 20 khan Vairengte ram Aitlang Zaua kuthnathawktuten harsatna an tawh leh Mizoram Police duty-te dinhmun leh harsatna an tawh enfiahin kan kal a. Assam lam hian an police-te awlsam leh nuam zawka an inkalpawh zung zung theihna’n Vairengte Sabual muala Pu Phirthanga leilet an laih bakah Pu J Samuela huanah exacavtor pahnih hmangin kawng an rawn lai thar nasa hle tih an hmuhchhuah thu a sawi.
July 29-a Mizoram Home minister-in thuthar thehdarhtute hmaah, an sawrkar hnu ah ramriah status quo bawhchhiatna thar a la awm lo nia an hriat thu a sawi chu pawi an tiin, Vairengte mipui rilru a na hle tih a sawi a. Home minister-in status quo chhungah hma thar lakna a awm lo, a tih ni, July 29 ngei pawh khan Assam sawrkar chuan Vairengte Aitlangah kawng a la lai reng tih Home minister hian a hre lo der nge Mizoram sawrkar hriatruk puiin, Assam sawrkar hian kawng an lai tih chu MNF Serlui North Block zawhna a ni tih a sawi.
‘Home minister hian Zoram mipui hmaah dawt chiang tak a sawi avangin ngaihdam dil turin kan phut a. Ramri venhim leh thuam chak turin a ranglama hma la a, Assam sawrkarin status quo chhunga an hmalakna hi tihtawp tir nghal turin kan ngen a ni,’ a ti.
Mizoram huamchin ram an laihchhiat vek tawh hnu, August 9-a Mizoram sawrkar leh Assam sawrkarin remna kawng zawnga inbiak an tum mek chauh chu Mizoram sawrkarin ramri a vei tawk loh zia leh ralkhat atang chauha ramri vei sawrkar an nih zia a lantir tih sawiin, ‘MNF sawrkar anga huaisen taka ramri humhalha hma la turin ZPM sawrkar kan ngen a. Kuthnathawktute harsatna hrethiamtu mipui sawrkar nia an insawi ang ngeiin a taka chechhuak turin kan ngen a ni,’ a ti.
Vairengte Aitlang leim kuthnathawka eizawngtute feh kawng leh Mizoram Police ramri venga duty-te chakkhai lakna ber chu ni 30 chuang lirthei eng chi mah kaltlang thei loa awm chu July 29 a Agriculture minister-in Vairengte paltlanga N. Chawnpuia rawn khuallianin kuthnathawktute harsatna hriatpui lo leh a hmunhma tlawh loa Vairengte a chhuahsan leh mai chu kuthnathawktute tan a vanduaithlak hleah an ngai tih MNF Serlui North Block hian a sawi bawk.