Storm Éowyn hnuah UK-in Herminia tuar leh

Storm Éowyn hnuah UK-in Herminia tuar leh
Storm Éowyn an tawrh hnu lawkah UK-a hmun thenkhat chuan thlipui leh ruah thahnem tak an dawng leh dawn a, hei vang hian inralrinna dar khawn a ni.
Met Office chuan Spain leh France lo nuai tawhtu, Storm Herminia an hmabak mek tih sawiin inhliamna leh ‘nunna atana hlauhawm’ a thlen thei dawn niin an sawi a. Éowyn avang khan kar hmasa tir lam khan mi pahnih an thi a ni.
Khaw awm dan avanga yellow warning an tihchhuah hian England pum deuhthaw a huam a. Northern Ireland, Wales leh Scotland chhim lamah pawh Thawhtanni atanga ruah tam tak sur turin an sawi lawk.
England chhimthlang lamah chuan Herminia-in a ken thli na tak avangin power line a chat nasa hle a, tui lenna a awm nghal nual bawk.
Thli natna lai ber chu UK chhim lam leh khawthlang lam a ni a, a hmaa Éowyn tuar ve lote an ni.
Devon leh Cornwall-ah chuan mi tam takin power an nei lo va, England chhimthlang hmun tam takah tui lian leh thing tluin kawng a dang nasa hle bawk.
Tui fawn invawrh sang tak avangin mi chengte chu tuipui kama kal lo tura tih an ni.
England laili leh chhim lamah chuan tui lian inralrinna hmun eng emaw zatah tihchhuah a ni a. Veivahna a tibuai nasa hle bawk.
Cornwall-a Par leh Newquay inkar chu tui lianin a dang a, Pathianni pawh khan rel tlan tur tam tak thulhtir a ni a, tlai lam atangin an tlan leh thei tan thung.
Cornwall Airport Newquay leh Exeter Airport atanga thlawhna thlawk turte pawh tihkhawtlai, thulhtir leh an kawng thlak an awm nual bawk.
Thli hi a natna lai, tuipui kam velah chuan darkar khata km 112-a chak a tling a, ram lailiah erawh chuan heti lutuk a ni lo hlauh.
England, Wales, Northern Ireland leh Scotland chhim lamah chuan ruah mm 10-20 vel a sur a, Thawhtanni pawh khan a la sur chhunzawm bawk.
Storm Herminia hi Spanish weather service Agencia Estatal de Meteorología (Aemet)-in Zirtawpnia a hming an phuah kha a ni a. An ram chhim lam chu thli leh ruah na tak nen a lo nuai hmasa tawh.
France khawthlang lamah pawh tui tilianin lirthei a len a, in a chim nasa hle bawk.
Herminia hi UK-a Met Office-in a hming a phuah theih khawpa na a ni lo va, Éowyn kha a ni thung a, chhiatna pawh a thlen nual a, inralrinna pawh an khawn khât tak, red weather warning an tichhuak a ni.
Met Office chuan Éowyn khan kum 10 chhunga UK-in ‘a tawrh nat ber’ ni hiala an hriat thu ans awi.
Zirtawpni khan an chuanna car chu thing tluin a delh avangin mi pahnih an thi a. Power lian a tihchhiat nasa avangin Scotland, Northern Ireland leh Ireland hmun tam takah Pathianni thlenga power la nei lo an awm.
A thawh nat vanglai chuan mi maktaduai telin power an nei lo va, kawngpui leh rel kawng tam tak a dang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More