Strait of Hormuz hawn beisei, hawn loh chuan US-in chet nat tum

Donald Trump-a chuan Strait of Hormuz chu hawn ‘thuai a ni dawn’ tih a sawi a, a nih loh chuan Iran chu ‘na takin’ an kap dawn tih a sawi a. Inremna a awm beiseina avangin chawlhkar thum chhunga tuialhthei man a hniam lai ber a thleng thar bawk.
US president hian Secretary of State Marco Rubio leh Treasury Secretary Scott Bessent ten kartawp atang hian dan pangngaia lawng a kal theihna tura inbiakna a kaltluan thu an sawi hnuah Fox News hnenah a sawi veleh a ni.
Khawvela tuialhthei man tehna atana hman, Brent crude chu a phurhna kawng a awlsam leh thei hnai tih puan a nih hnuah 5% dawna tlahniamin barrel khat $80 hnuai a ni nghal.
Hetih lai hian tun hnaia inbiakna a hlawhchham fo avangin tuialhthei sumdawnna a khawih nasa a, a man sang hian lirthei neitute a nghawng hle.
“Sawihona tha tak kan nei,” tiin Trump-a chuan California a tlawhnaah sawiin Iran chuan tun thla tawpah hian buaina chin fel vekna tur remna ziah a tum niin a sawi.
US Central Command (CentCom) chuan ‘Strait of Hormuz chhim lam kawng chu a zalenin sumdawng lawngte tan a kal theih reng’ tih a sawi.
Thawhlehni khan Brent crude leh US West Texas Intermediate man chu 5% aia tama a man tlahniamin barrel khat $76 a ni a. July 13 hnua a tlawm lai ber a ni.
Rubio-a chuan Iran leh Oman te nen strait-ah lawng tam zawk a kal theihna tura an inbiakna a kaltluang tih a sawi.
“A tawp kan la thleng chiah lo va, kan thlen thuai erawh ka beisei,” tiin State Department-a thuthar lakhawmtute a kawmnaah a sawi.
Bessent-a pawhin Strait of Hormuz hawnna tur inremna hi Thawhlehni emaw, Nilainiah emaw an tihfel hman a beisei tih a sawi bawk.
US sorkara mi pawimawhten inbiakna a kaltluang tih an sawi mek laiin eng inremna tak nge siam a nih dawn tih erawh engmah puan a la ni lo.
Iran chuan US nen an indawr lo va, indawr tura ruahmanna pawh an siam loh thu a sawi a, Oman nen erawh an inbia tih a sawi.
Iranian foreign ministry thupuangtu chuan palai, Oman nen hian Strait-a lawng a kal theihna tura an inbiakna chu a tha lam a nih thu a sawi thung.
Washington leh Tehran inkara palai, Qatar pawhin palai dangte nen indo titawp tura hma an lak reng thu a sawi ve bawk a, hmaichhana ram pahnihte inbiakna erawh a awm lo tih a sawi bawk.
Strait of Hormuz hi US leh Iran buaina ber a ni a. February thla tawpa an indo hma khan khawvela tuialhthei leh liquefied natural gas phurh kual hmun ngaa thena hmun khat kalna kawng a ni.
Iran chuan indo chhuah atangin a khar deuh ngar ngar a, US-in lawng chawlhnate a dansak bawk.
Strait khar laia lawngten kalna atana an hman ber pakhat, Red Sea-a Saudi Arabian lawng chawlhnate chu Iran-in a puih, Yemen-a Houthi-ten July 20 atanga a dan bawk avangin bungraw phurh a buai zual phah hle a. Thil man pawh a san phah hle a ni.