Mi 60,000 tlanchhiat phahna ram tikangtua puh man

US-a Washington state, Spokane khawpuia cheng mi 60,000 chuang insaseng phah a ngaihna ram kang nasa tak chu a haltu nia rin man a ni.
State chhunga mihring cheng tam ber dawttu khawpui hmarthlang lam hnai takah hian kartawp atang khan ram kang lian tak hmun thumah a chhuak a, kang thelhtuten tihmih tumin an la bei mek zel.
Kum 37 mi, Aaron Farinacci-a nia hriat chu kangmei chhuah tanna bul hnimah a thingthi lai hmuh a ni a, a hnuah nawhalh leh lighter hmuh a ni bawk tih Spokane County Sheriff-in a sawi.
Mi 2,30,000 vel chenna, Seattle khawchhak lam km 450 vela hla, Spokane-ah hian in 700 chuang a kang chhe tawh a, ram acre sang tela zau a kang chhe tawh bawk.
Washington Governor Bob Ferguson-a chuan ‘mangchhe rapthlak tak’ a nih thu sawiin, “Spokane chanchina khuarel chhiatna nasa ber a nih hmel hle,” a ti.
Mayor Lisa Brown-i pawhin ‘thi an awm theih mai’ a rinawm thu a sawi a, mite chu an ina let leh theih hun tur sawi theih a la ni lo tih a sawi bawk.
Thi leh hliam tak erawh sawi a la awm lo va, an in leh lo ena kir lehte erawh chuan an thil hmuhin a barakhaih tak zet tih an sawi hlawm.
Thuneitute chuan an mobile phone-a an biak tlang theih loh mi 14-te an zawng mek a, chin hriat loh angah erawh chhiar an la ni lo.
Sheriff John Nowels-a chuan mi dangte ang bawkin an inthiar chhuahnaah signal hloh emaw, an phone battery thi ta emaw an ni thei tih a sawi.
Spokane khawpuia ram kang pathum – Old Trails, Fairview leh Autumn Lane an tihte hi Washington state-a ram kang mek 16 zinga mi a ni tih an state department of natural resources chuan a sawi.
Kang thelhtute chuan kang pahnihah hian hma an sawn hret a, Thawhlehni khan khua a daih deuh va, thli pawh a nemdeuh bawk a, hei hian a pui hle a. Hetih rual hian kartawp lamah khua a lum thar leh dawn tih sawi lawk a ni.
Farinacci-a hi Old Trails fire tichhuaktua puha man a ni a, pawikhawihna lian ber tia puh niin bond pawh $ maktaduai 1 keng a ni.
Chenna leh sumdawnna hmun telin in tam tak a kang chhe tawh tih video darhah a lang a, chung lamah kang thelh helicopter a thlawk lai a lang tel bawk.
Governor Ferguson-a chuan state pumah pawn lama thil hal a khap.
Washington hmun hrang hranga kang thelh tur hian 900 chuang thawk chhuakin state dang atang pawhin an thlen belh thuai dawn.
Scientist-te chuan mihringin a siam sik leh sa inthlak nasa avangin khaw lum, ro thlenin hei hian ram kang a tiawlsam a, khaw lum uchuak leh puia khawkheng a na thei bik niin an sawi.