Strait of Hormuz hawn nen Oman nen kan inrem – Iran

Iran chuan Strait of Hormuz-a lawng a kal theihna tur siam chungchangah Oman nen inremna an siam thu a sawi.
Foreign ministry thupuangtu, Esmaeil Baqaei-a chuan a kimchangin a sawi lo va, ‘a tawp lam an thleng’ tih erawh a sawi.
Baqaei-a hian Oman nen inremna siam mah se US-in Iranian lawng chawlhnate a dan avangin strait-ah hian him taka kal theih a ni dawn tih a sawi ngam loh niin a sawi a. US leh Oman chuan inremna hi engmah an la puang rih lo.
February thlaa US leh Israel tang dunin Iran an beih hnuah Tehran hian khawvela tuialhthei leh liquefied natural gas phurh hmun ngaa thena hmun khat vel kalna, Strait of Hormuz hi a dang a ni.
Thawhlehni khan US President Donald Trump-a chuan Iran hian strait hi ‘rang takia’ a hawng lo a nih chuan ‘na taka beih’ an tum thu a sawi tawh.
A hma lawkin US thuneitute chun kar tawp lam atang chuan hawn a nih theih nan inbiakna a kal tluang tih an sawi a. Iran erawh chuan US nena an inbe lo va, biakna pawh an tum loh thu a sawi thung.
Strait hawn hi ram pahnihte leh an kara palaite thil sawiho lian ber leh khirh ber a ni.
Iranian foreign ministry thupuangtu chuan Oman nen hian ‘kalna tur kawng bik’ an pawm thu a sawi a. “Strait of Hormuz hi US chan lamah a la him chuang lo va, Iran kalha lawng chawlhna an dan avangin hlauhawm a la awm reng,” tiin a sawi tih Iran-a sorkar hnuaia Irna news agency chuan a sawi.
Iranian Deputy Foreign Minister Kazem Gharibabadi-a pawhin a hnuah Irna hnenah hian kawng thar siam chu a lailawk atan niin thli hnih atanga thla li vel hawn a ni dawn tih a hrilh a, a bak a sawi lo.
Tuialhthei man chu Ningani khan a tlahniam leh hret a, a man tehna ber, Brent crude chu 0.3%-a tlahniamin barrel khat $79.24 a ni.
Tuialhthei leh boruakalhthei man hi a phurh kual 20% vel kalna kawng a buai avangin indona chhuah hnuah a man a su nasa hle.
Indo hnuah strait-ah hian a phur an kal tlem hle a, a kaltlang tur zawng zawngin Iran atangin phalna an lak a ngai a, an thupek zawm lo chuan bei zel a ni.
Tehran leh Washington inkara inrem theih lohna lian tak chu Iran-in strait kaltlang lawngte hnena kal man lak a tum chu a ni.
An hotu lian pakhat chuan an bungraw phurh man atanga 5% leh 7% inkar vel lak an tum niin a sawi tih Reuters chuan a tar lang a. Oman chuan 3% vel la turin a dawr a, Washington phei chuan lak miah loh a duh.
Rawtna tharah hian Tehran hian Strait of Hormuz kaltlanga Gulf-a lawng lut a thunun vek dawn niin Reuters chuan a tar lang.
June thla khan Iran leh US hian indo tihtawp, strait hawn leh ni 60 chhung inbiak zuina atan Memorandum of Understanding (MoU) an lo siam tawh.
A hnu lawkah MoU hi thiah niin an inbei a, an inchhang let tawn zui ta zel a ni.