Vantlang hmaah Hasina-i inlan, haw a tum thu a sawi leh

Bangladesh prime minister hlui, Sheikh Hasina-i chuan an ramah thi tura a chungthu rel ni mah se kum hnih chhung a tlanchhiat tawhna, India atangin a haw dawn tih a sawi nawn leh.
Kum 78 mi hi kum 2024 khan a sorkar laka lungawi loten paih thlain an thenawm ramah hian a lut a. Nilaini khan Foreign Correspondents’ Club (FCC) of South Asia-in a fapa, Sajeeb Wazed Joy leh education ninister thin, Mohibul Hasan Chowdhury Nowfel leh Awami League hruaitu dangte nen video link hmanga an chhimnaah an haw dawn thu a sawi a ni.
“Min lo man mai thei a, ung inah min dah mai thei a; mahse, ka mite tana ka tih tur hlen tura thutlukna siam hi ka hlau lo,” a ti a. “Ka hmangaih ka miten an tawrh la hian ka tlan bo reng thei lo,” a ti.
A haw hun tur tak erawh ‘a lo thlen hunah’ puan a nih tur thu a sawi a; mahse, December thla a duh thu a sawi thung.
Hasina-i hian an rama a kaihhruai, Awami League party awm khapna chu hlih ngei tur a nih thu a sawi bawk a. A fapa chuan tuna sorkar nen hian an inbiakpawh loh thu a sawi.
Hasina-i hi zirlaite kaihhruaia a sorkar laka lungawi lohna lantirtute hmet mit zo lova paih thlak a nih khan helicopter hmangin New Delhi a pan nghal a, Bangladesh-ah a la kir leh lo.
Nikum khan Dhaka-a a chungthu an ngaihtuah laiin a tel duh lo va, hetah hian mi thahna tur thu pe leh mi tam tak tawrhna thleng thei dang thei lova puhnaah thiam loh chantir a ni a. A mihringpuite laka a chet dan avangin khai hlum tura tih a ni.
India-in ram pahnih inkar tha lo siam that tuma a beih lai mekin Bangladesh-a kir leh hi a tum a ni.
Dhaka chuan thawn haw turin a lo ngen tawh thin a; mahse, New Delhi chuan an ngenna hi dan mitah kalpui dan tur thlithlai mek a nih thu a sawi thung.
Bangladesh-ah hian Prime Minister Tarique Rahman-a kaihhruai sorkar thar a ding leh tawh a, ani kaihhruaina hnuaiah hian an inlaichinna pawh a ziaawm leh hret tawh a. India chuan September thlaa BRICS (Brazil, Russia, India, China, South Africa) summit a thlen turah pawh tel turin a sawm.
Nilainia Hasina-i’n thu a sawi hma hian Indian foreign ministry thupuangtu, Randhir Jaiswal-a chuan Thawhlehni khan a thu sawi tur chungchangah hian inrawlhna engmah an neih loh thu a lo sawi tawh.
“He thilah hian sorkarin telna a nei lo va, a thil sawi hi tha a tih zawng emaw, a thlirna pawh a ni lo,” a ti.