Striker Ekitike mana inhuam thui Liverpool

Striker Ekitike mana inhuam thui Liverpool
Eintracht Frankfurt atanga striker Hugo Ekitike leichhuak turin English champion Liverpool chuan sum hmahruai pound maktaduai 69 phawrh an remti thei ta a, player khelh zet leh goal thun zat (add-ons) azirin a man hi pound maktaduai 10 la pekbelh leh theih turin an inrem.
Kum 23 leka upa French striker hian nikum mai khan Frankfurt a zawm a, Anfield club-in a man pumpuia pound maktaduai 79 tling chho tura Bundesliga club an inremsiampui tak hnuah keini huna nizan lam khan medical test hmachhawn tura UK a thlawhluh hman rin a ni.
Ekitike hian kum ruk daih contract a ziak dawn niin sap media-te’n an tarlang a, tukar tawp hian Liverpool Asia tour ruala a chhuah ve hman rin a ni. Arne Slot-a squad hi pre-season tour-in Hong Kong leh Japan ramah an zin dawn a ni.
Player ngaihven rawn hlawh tak Ekitike hian season liamta khan Frankfurt tan game 31 a start pha a, tah chuan goal 15 thun tlingin, German club chu Bundesliga lamah pathumna a nihpui.
Season liamta German top flight-ah khan Ekitike aia goal thun hnem chu panga chiah awmin, assist pawh vawi riat a nei tling a; goal-ah belhlhawmin shot tum 117 a nei tling a, shot ngah ber a ni nghe nghe.
English Premier League club dang Newcastle pawhin lakluh tumin an dawr a, mahse, a zavaia pound maktaduai 70 bak an phawrh ngam tak loh avangin kar liamta khan Ekitike an dawrna chu hnawl fithlak sak an ni a, an aiah Liverpool an rawn dingcahgn ta zawk a ni.
Reds hian Magpies striker Alexander Isak pawh tunlai hian an beisei mek a, eng chen nge indawrna an kalpui tawh hriat theih a ni mai rih lo.
French striker mana sum hmahruai pound maktaduai 69 phawrh an remtih tak hnuah tun nipui insuan chhunga Liverpool bazarna sum phawrh chuan pound maktaduai 250 a pel dawn ta a ni.
Nipui transfer chhung hian Florian Wirtz chu British record (£116m) ni thei tura ngaihin an thlugn fel tawh a; defender an sengluh thar pahnih Milos Kerkez leh Jeremie Frimpong manah belhkhawmin pound maktaduai 70 an seng tling tawh bawk.
Versatile attacker an tih ang player Ekitike mana inremna an peih hma hian kumin nipui bazar-ah Liverpool hian thawm an neilian hle a; player hriat hlawh tak tak an chhuahtir zingah Trent Alexander-Arnold chuan Real Madrid a pan a; Jarell Quansah chu Bayer Leverkusen-in an lachhuak a; Caoimhin Kelleher pawh Brentford lamah a kal tawh bawk.
Inhralh kawngah Reds hian duhtawk an la ngah mai dawn lo niin a lang a, tun nipui thawt chhunga Anfield chhuahsan leh tura beisei player hraw chinte zingah Darwin Nunez, Luis Diaz leh Harvey Elliot an la tel cheu!