Sum chingpena thiam loh chantir nuai 4 chawi turin court-in a ti

Sum chingpena thiam loh chantir
nuai 4 chawi turin court-in a ti
Mizoram Khadi & Village Industries Board a enkawl laia sum tihchingpenna awm avangin Prevention of Corruption Act Court special judge chuan Lalsawmzuala chu thiam loh a chantir hnu ah cheng nuai 4 chawi turin a hrem.
PC Act Court hian Mizoram KVI Board chief executive officer hlui Lalsawmzuala hi Saitual leh a chhehvela fu chingtute loan rulhna atana ‘margin money’ an ruahman sak atanga la bang Rs. 9,08,369 chu office tana Maruti Van leina leh chawhlui buatsaihna senso vela lo hmang puk a, rulh leh tak chuan loh naah a mawhphurtuah ngaiin thiam loh a chantir a.
Rural Employment Generation Programme sum cheng nuai 4 leh cheng nuai 5 dang pawhpennaah pawh CEO a nih anga bill lem leh lehkha tul dang lem siamnaah mawhphurtua ngaiin thiam loh a chantir bawk.
Khuai khawi tih hmasawnna atan sawrkar laipui Ministry of Agriculture atanga sum lokalah tanpuina dawng anga office-in a tarlan zingah dawng tak tak lo an awm tih leh, heng mite training peknaa KVI mithiamte zinchhuahna bill siamnaah, an zinchhuak tak tak lo tih court hmaa finfiah a nih avangin, mawhphurtu bera ngaih CEO hi thiam loh chantir a ni leh a ni.
Heng thil hrang hrang zirchiannaah Court hian KVIB CEO hlui Lalsawmzuala hi, thiam loh chantir a nih avanga 2023 April 10 tlaia Central Jail-a dahluh a nihna, zan khat riaka a tan chu lung ina khungna atan chuan tawk riha ngaiin, lung in tang zui lo turin a ti a. Thiam loh a channaah erawh cheng nuai 4 chawi tura tiin, sum chawi tur hi a pe thei lo a nih chuan kum hnih chhung lung in tana tlak turin a ti
Court-in hremna nep zawk a pek chhan a sawi danin, Lalsawmzuala hian a mimal tan sum chingpen hi a lo kawl emaw a lo nei tih finfiahna a awm loa; amah hi kum upa tawh tak, hriselna tha tawh lo a ni a, lung ina rei tak dah tur chi ah a ngai lo. A hma lamin Lalsawmzuala hi criminal thubuaiah thiam loh chan tir a la nih ngai loh bawk avangin, ngaihnatthiamna nei chungin hetiang hremna hi a pe tih a sawi a ni.