Sum harsat vangin Relief Camp sak chhunzawm thei lo mai thei

Thla a vei tawh a, mahse Hlimen-a leimin tuarte awmna tur relief camp sak zawh a la ni lo. Sum harsat vangin camp hi sak chhunzawm a ni lo mai thei bawk.May ni 28-ah remal cyclone leh ruah vangin Hlimen-ah nasa takin lei a min a, he leimin tuartu, mahni chenna in atanga chhuakte awmna tur relief camp sak ni mah se hma an sawn hlei thei lo.
Hlimen Local Council leh YMA kaihhruaiin khawtlangin Hlimen-a Central Workshop hmunah relief camp hi an sa a, sum harsat vangin hna an thawk chak thei lo tih thu dawn a ni.
Hlimen khawtlang hruaitute sawi danin, chhungkaw 68-in an chenna in an chhuahsan a, ngaihtuahpui ngai lova awmna tur mahnia zawng hmu thei an awm avangin chungkaw 48 vel awmna tur relief camp sak an tum ta a ni. June ni 22 khan chhungkaw 10 an lut a, thla a vei hnuah pawh anni chauh hi relief camp-a lut an la ni.
“Sum harsat vangin hna a chak thei lo a ni. Kan sak chhunzawm zel thei ang em tih pawh ngaihtuah tham a ni,” YMA hruaitu pakhat chuan a ti.
Thawhlehni hian chhungkaw 10 an luh leh theih an beisei a, chumi bak chu an sak chhunzawm thei ang em tih an riat bik loh thu, hei hi sum harsat vang a nih thu YMA hruaitute chuan an sawi.
Hlimen YMA hruaitute’n The Aizawl Post an hrilh danin, sorkar atangin sum an la hmu lo a, a tira sorkarin cheng nuai 6 a pe dawn tih pawh kha, an la hmu lo. Chhungkaw 10 awmna an sak tawhah hian cheng nuai 12 an seng a, chhungkaw 10 dang Thawhlehni-a lut turte awmna tur hi chu a hmun laih te a ngaih loh avangin cheng nuai 12 an seng tling lo. Sak belh zel hi an tlin ang em tih ngaihtuah a ngai tih an sawi.
“Sorkar atangin cheng khat pawh kan la hmu lo. A bain kan thawk a, sak chhunzawm zel ta ila phur a rit dawn riau a. Dik tak chuan, tuna kan thlen chin atanga han thlir hian, sorkar atang hian sum hi hmu lo thei kan ni a, hmu lo ta ila leiba kan ngah dawn lutuk a,” YMA hruaitu pakhat chuan a ti.
Hlimen khawtlang hruaitute sawi danin, chawlhkar liam ta Thawhtanni (June ni 24) khan home minister an hmu a, ‘Lo sa zel rawh u, sum pawh in rawn la dawn a nia,’ a lo ti a, Zirtawpni khan sum chu an han ngaihven a, sum a awm loh thuin an lo chhang a ni.
A theih ang angin vehbur an khawn a, mahse relief camp hetiang tiat sakna tur chuan a lo ngai tam si a, sorkarin a tum dawn tiin a bain hna an tan tawp mai tih chu khawtlang hruaitute sawi dan a ni a, leimin vanga nunna chante zawn hna thawh laia tanpuina an dawn, an hman bang kha hlawhfa rawih nan an hmang a, a bak chu a bain an thawk tih an sawi.
Chhungkaw 48 vel awmna tur sa turah an inngaih laiin chhungkaw thenkhat chuan in luah tur an hmu tih an sawi a, relief camp-a awm mamawhte an khawngaihthlak thu sawiin, chhungte an bel a, thenkhat chu an insem darh a, chutiang chuan an khawsa nawk nawk a, an zahawm hle tih te an sawi.