Sawrkar tuma hma an laknaah an party chuan duh ang zat sum hman tur an nei ve thei loa, thawhrumna hmanga sawrkar an tum dawn tih ZPM president Lalliansawta chuan a sawi.
-- Advertisement --
Thawhtannia an party office-a inkhawmah ZPM president chuan party hrang hrangin sawrkar tuma hma an laknaah tam takin sum hmatheh tur an neih theih laiin, an ni chuan sum hman tur duh ang an nei ve thei loa, ECI-in MLA inthlana sum hman theih zat a bituk cheng nuai 28 pawh an tan chuan sang tak a ni tih a sawi.
“Sum hmachhuan tur kan nei ve dawn loa, Pathian rinchhanin kan kal zawk dawn a, chu chu kohhran duhdan leh min beisei dan a ni. Sum hmanga inleitlin tumte chuan engzat pawh thehchhuak se, keini chuan dik leh fel takin, thawhrimna in hneh kan tum dawn a ni. Vote hmuh tam leh tlin tumna’n ringawta thawkrim tur kan ni loa, thawhrimna hmangin ram kan siamtha dawn a ni,” a ti.
Taima leh thawkchhuak hnemte hlawhchhamna ramah kan cheng mek niin Lalliansawta hian a sawi a. Hmasawnna tur sum mimal kuta a luh vak vakna ramah chuan engkim mai hi mipuiin kan inchuh ruih ruih a, kan rilru a dik famkim tawh loh avangin he ram hian kalphung thar a mamawh, tiin a sawi. “Kan chungah Pathian a lungawi chuan inthlanpui kan hmachhawn turah kan lamah a tang ngei ang; chutiang tur chuan mipui hian kan zir phawt a ngai,” a ti.
ZPM MLA leh corporator te hna an thawh that zia leh an taimak zia mipuiin an hria nia sawiin, in ropui leh ram zau tak tak neih kawngah chuan chhuan tur an awm loa, hnathawh kawngah erawh chhuan tlak leh entawn tlak an ni tih a sawi. “Kumtawpah kan inthlang dawn a, mi tha tak tak kan la nei teuh a, ZPM-in ram enkawl hna a thawh hun hi mipuiin an nghakhlel tawh a ni,” ZPM hruaitu hian a ti.