Sum leh oil renchemna atan sawrkar inhrekna tur duang
Prime minister-in ram pum tana ngenna a siam angin Mizoram sawrkar pawhin a hnuaia thawkte chu sum leh oil inrenchemna atan kalphung hman tur a duang thar a. In atanga hna thawh, sawrkar lirthei tlan chhuah loh ni siam leh traffic jam avanga hun leh oil a hek lohna turin sawrkar department ho pawh pawl hniha thenin pisa kai hun a siamsak a. Heng ruahmanna hi vawiin – May 21 atanga hman tan a ni ang.General Administration Department (GAD) chuan May 19 khan he hriattirna hi a tichhuak a. A tihchhuah hnu ah a hnukkir leh rih a, hemi zan vek hian hriattirna hi a tichhuak tha leh a ni.
Hriattirnaa tarlan danin, West Asia-a buaina avangin tun thlengin India-in a duh zat ang oil leh gas a la hmuh theih loh bakah oil man a sang zel a, hei hian ram economy a nghawng avang leh eng chen nge he buaina hian a awh dawn tih hriat a nih loh avangin, sawrkar/mipui sum kal ral tam lutuk tur ven tul nia hriat avangin state thenkhatah chuan anmahni-in ruahmanna an lo siam tawh tih a sawi.
Heng state ho lo kalpui tawh dan zulzui hian Mizoram sawrkar pawhin inrenchem hi kalpui tul a ti a. Sawrkar department tin chu thawktu an neih atanga zaa 20 zel inbanleka anmahni in atanga thawk thei tura ruahmanna siam turin department hotute hriattir an ni a. Hengah hian mipui mamawh nghal thin – hriselna leh rikrum thila chetchhuah ngai, tui, power, transport lam leh dan leh thupek kengkawhtute erawh a huam tel lo.
Sawrkar pisa kai hun laia traffic jam nasa lutuk thin chuan tul loa oil hman a ti tam nia ngaih avangin, chumi ti tlem tur chuan department ho kal hun chu hun hniha siam a ni a. A kal chhuak hmasa ho hi zing dar 8.30 ah pisa an kai tan anga, tlai dar 4.30 ah bang ang. Kalchhuak tlai tur zawk ho hi chawhma dar 10.30 ah pisa an kai tan anga, tlai dar 6.30 ah an bang ang.
Nilaini chu sawrkar lirthei tan tlan chhuah loh ni a ni anga, sawrkar hnathawkte chu ke emaw public transport ho hmang tangkai tura tih an ni.
Lirthei hman tih tlem a nih theihna a theih chin chinah inbiak hmuh theihna (video conferencing) hmang uar turin department tin chah an ni a. Chief minister, minister leh sawrkar hotu dangte programme neiha vahvelnaah sawrkar official-ten anmahni lirtheia zui ang chi tih tlem tum tura ngen an ni a; sawrkar suma state chhung, ram chhung leh ramdanga zinchhuah chu a theih chin chinah ti rih lo tura chah an ni bawk.
Hei bakah hian department tin chu an office-ah kawlphetha hmang chi hrang hrang lakah theih anga inrenchem tura tih an ni a. Thil lawm leh programme senso tam ang chi laka insum rih tura tih an ni.
Department ho kal dan tur:
Group 1 (8.30 am – 4.30pm) Group 2 (10.30am to 6.00pm)
1. Agriculture & Farmer’s Welfare
2. Art & Culture
3. Co-operation
4. District Council & Minority Affairs
5 Environment, Forests & CC
6 Fisheries
7 General Administration
8 Higher & Technical Education
9 Horticulture
10 IPR,P&S
11 LESDE
12 Land Revenue & Settlement
13 Parliamentary Affairs
14 Planning & PI
15 Power & Electricity
16 Public Works
17 School Education
18 Social Welfare, W&CD
19 Tourism
20 UD&PA 1 AH&Vetry
2 Commerce, Industries, G&M
3 DM&R
4 Excise & Narcotics
5 Finance
6 FCS&CA
7 Health & Family Welfare
8 Home
9 Information & CT
10 Irrigation & Water Resources
11 Land Resources, Soil & WC
12 Law & Judicial
13 Personnel & Administrative Reforms
14 Political & Cabinet
15 Public Health Engineering
16 Rural Development & Administration
17 Sericulture
18 Sports & Youth Services
19 Transport
20 Vigilance