Sum leh pai tuaka hmanhlel ram hruaitu kan mamawh lo – Dr Vanlalthlana
In leh lo tha, sum leh pai tuaka hmanhlel ram hruaitu kan mamawh tawh lo tih MLA Dr Vanlalthlana chuan a sawi.
Thawhtannia ZPM office-a inkhawmah Dr Vanlalthlana chuan an khingpuiten inthlan dawnah ram hruai dan tur an hre thar thin a; ZPM chuan an tih theih tur chin bak an sawi dawn loa, mipuiin chance an pek ve erawh a ngai tih sawiin, “Mipui an nat ruala na ve thin ram hruaitu kan mamawh a, mipui nat laia in leh lo tha, sum leh pai tuaka hmanhlel ram hruaitu hi he ram hian a mamawh tawh lo,” a ti.
Brig T Sailo-a’n Bairabi Hydel Project atana hma a lak chu a hnu amiten an ti zuzi a, 1998 ministry-ah khatih laia MPC lam atanga Power minister-in a tharthawh leh laiin an thawhona a tawp a, a zuzi leh a; Tuivai Hydel Project pawh a zuzi leh tawh tih a sawi.
“A hunlaia an tih theih loh hi ro lo rel tawhte hian sawi nawn tawh suh se. Power hi buaipui tak tak an tum em, tih hi kan zawhna a ni. Power kan leina atana kan hloh zat hi kum khatah cheng vaibelchhe 400 a ni a, sawrkar department 47 atangin department budget pumpuia vaibelchhe 400 nei tling lo department 40 kan nei. Power hmanga intodelhna tur tih zuzi a nih thin dan kan sawi hian engmah ti lo angin kan sawi loa, an ti zuzi tih erawh kan sawi a ni,” a ti.
Congress president Lalsawta chungchang a sawi a. “World class education min tiamtu khan a hnuah Finance minister dinhmun a luah a, school tlabal tam zia leh fate luhna atan pawha an duh bik loh chuan school tam tak min hnutchhiah a ni,” tiin, tuna tih dan thar rawn hre thut chu mipui tan rin ngam chi a ni em, tiin a zawt.
Kum 2022-ah quality of road infrastructure-ah India ramah Mizoram chu a hniam ber a nih laiin, rorel lai party chuan kan kawngpui that vanga lawmthu sawina resolution House-ah pass turin an pulut ngam tho tih MLA Dr Vanlalthlana hian a sawi a. Hna hmanhmawh thlak, tia restricted tender an pek ur ur ten an thawk muang em em si tih a sawi. “Hna hmanhmawh thlak, tiin hmahmawh takin airport an sa chim leh rem rum lawi a. An hmanhmawh em avangin lockdown lai pawhin an chawl phal lo,” a ti.