Sum siam nana MLA fund hmangah ZPM leh Duhoma puh

MNF media & publicity department te’n Zirtawpni khan thuthar lakhawmtute an kawm a, Serchhip bial ZPM leh MLA Lalduhoma te chu sum siam nana MLA fund hmangah an puh.
“ZPM chief ministerial candidate leh Serchhip MLA ni bawk Pu Lalduhoma’n MLA fund atanga dam lo Zoremsangi, Serchhip Dinthar W/o. H. Zoramsiama a kan chungchangah dam lo Zoremsangi ka ngei atangin Serchhip MNF hruaitute’n Rs, 1000/- chauh a dawn thu a sawi a. A pasal Pu H Zoramsiama’n Rs. 2,50,000/- an dawn loh thu a sawi voice record neih a nih tak bawk avangin, rintlakah ngaiin sum hi chheprelh a awm ni ngeiah kan ngai a. Sum chheprelh nia lang pe kim tura thuthar lakhawmtute kaltlanga kan ngen hnuah Pu H Zoremsiama, Serchhip Dinthar ZPM VCP chuan sum a dawn thu leh a account-a a luh ngei thu a sawi ta a. Sum hi an dawng kim tak tak a, an ta tak tak tur a nih chuan kan lawmpui hle a ni,” an ti a, mahse sum hi a account atang hian lak chhuah leh nghal a ni an ti.
“Pi Zoremsangi te hi an sum an account-a a luh tuk maiah Rs 2,30,000/- lakchhuah leh nghal a ni a. An account-ah chuan a lut ngei a, anmahni ngeiin an dawng tih an sawi na a, anmahni hrechiangte chuan an hminga pawisa lo kal hi anmahni pual a nih loh an ring thup a ni. An account-a pawisa lo kal hi anmahni pual a nih miau loh avangin ‘Pu Lalduhoma dam lo kanna hi Rs 1000/- bak kan dawng lo,’ tia an lo sawi hi thil awm takah MNF chuan kan ngai a. An account-a an dam lo kanna hminga sum lut hi ZPM Party leh an MLA hian sum siam nan an hmang niah MNF chuan kan ngai a ni,” an ti.
Serchhip bialtu MLA hian a fund atangin 2021-2022 chhungin dam lo kan nan Rs 16,42,000/- a hmang tih an sawi a, MLA fund hi dam lo kan nan hmang tam an tih thu sawiin, “Dam lohna chhuanlama hmangin hmasawnna hna thawhna tur sum, MLA fund hi Serchhip bial ZPM party leh an MLA Pu Lalduhoma hian sum siam nan an hmang niin MNF chuan kan ngai a. Society lem tam tak hmanga MLA fund thahnem tak thawk duh a nih avangin Pu Lalduhoma hian hetiang thil hi a ti duh ang tih kan ring nghet bur a ni,” an ti bawk.
“MLA sum a hmanna leh a khawsak phunga insawifiah ngai reng MLA an nei hi Serchhip bial mipuite kan khawngaih hle a. Sihhmui vantlang tui a lo lak pen te, MLA zin loh Bill a la te, Sihmui daia tualthihnaa rinhlelh kai em em a ni te, Assembly House-a ngaihdam dil ngai a ni te, party worker hnena zu man pe thin Kohran Upa, chhim leh hmara a thusawi danglam thin a ni te hian ngaihtuahna a ti thui a,” an ti bawk.