Sum thiltihtheihna fiah a ni leh dawn – K Sapdanga

Sum thiltihtheihna fiah a
ni leh dawn – K Sapdanga
Lunglei Municipal inthlan neih zawh takah sum thiltihtheihna danchah a ni tawh a, Aizawl Municipal huamchhung local council by election neih turah hei hi fiahin a awm leh dawn tih ZPM working president K Sapdanga chuan a sawi.
April 19-a vote thlak tur Zemabawk local by election neihnaa campaign kharna, Thawhtannia an neihah ZPM working president chuan, Lungleiah sum thiltihtheihna leh sum ni lo thiltihtheihna a indo tih sawiin, “Patling ngaihdan thudik dinchhuah tir tumna hi sumin a lei thei lo tih Lungleiah finfiah a ni a, chutah chuan sum mai maia patlingin a ngaihdan a hralh thin chu dik duhna hmangin tihtawp a ni. Zemabawka fiahna lo awm turah pawh hian diknain hnehna chang rawh se,” a ti.
ZPM Political Affairs Committee member TBC Lalvenchhunga chuan party-in mipui tana ruahmanna an siam leh hmachhawp lam ni lo, party dang sawichhe zawnga campaign chu a changkang tawh loa, ZPM chuan mipuiin an chanvo dik tak engtin nge an chan anga, kalphung thar hnuaiah hmasawnna engtin nge an neih theih ang tih chu an auhla a ni tih a sawi. “Sawrkar hian kan tu leh fate rulh tur loan cheng vaibelchhe 1000 min hnutchhiah mek a, he sum puk hian dik takin mipui hnen thleng se, a hmanna tur dik takah hman nise tih hi kan duhthusam a ni ta ringawt mai. Ram hruaitute hi a pawng takin kan sawisel ngawt lo, thil tha tam tak an ti tih kan hria. Chutihlaiin awmze nei leh dik zawkin kan sum pukte hmang se, tih hi kan duhthusam leh kan beisei a ni,” a ti.