Sawrkar ringawt tum ila nuai 5
sem tiamin kan pe thei – Lalsawta
Congress party chuan sawrkar leh MLA-a tlin ringawt tum nise, cheng nuai 5 sem an tiam thei a, an pe thei bawk tih an party president Lalsawta chuan a sawi.
Aizawl Municipal huamchhunga local council by election neih turah Thawhtanni khan Durtlang Leitanah Congress party hian campaign kharna hun an hmang a. MPCC president Lalsawta chuan mipui chu bum tlak kan ni tawh loa, khaichhuah tlak erawh kan ni, tiin, mipuite kawng dika hruai an duh a, tang puihna hmangin mirethei zawkte dam khawchhuahna an siamsak dawn tih a sawi.
“Mizoram hi mi taimate tamna rama siam hi kan thei a. Dinhmunin a zir loh avanga mahni in leh lo leh bungrua hralh ngai khawpa manganga awmte tan chhanchhuahna beihpui kan thlak dawn. Congress party hian sawrkar leh MLA-a tlin ringawt tum ila cheng nuai 5 sem kan tiam thei, sem pawh kan sem thei. Mahse, Mizoram mipui tana sawrkar tha pek hi kan tum a ni zawk. Keimahni leh kan tu leh fate tan ram nuam leh tha zawk siam turin thawkho ang u,” a ti.
Congress MLA Lalrindika Ralte chuan, mi duham leh mahni hmasialten ram rorelna in an luah tur a ni lo, tiin, chutiang mi an awm chuan ram tan mipui tha chakna hmanga do tur a ni tih a sawi. “Ram rorelna tha, sawrkar zahawm siam hi ram leh hnam tan kan tum a. Hlemhletna awm lohna sawrkar kan siam dawn. Chumi ti tur chuan mipui kan mamawh. Min ringhlel loin min awih sak rawh u. Min ring ngam ula, in rin angin kan awm ang,” a ti.
Sawrkar ringawt tum ila nuai 5 sem tiamin kan pe thei – Lalsawta
Get real time updates directly on you device, subscribe now.
Next Post