Sum thiltihtheihna khenbeh a ni – Lalduhoma

Sum thiltihtheihna khenbeh a ni
– Lalduhoma
Serchhip MLA by election leh Lunglei Municipal inthlanah sum thiltihtheihna khenbeh a ni tih ZPM leader Lalduhoma chuan a sawi.
Thawhtannia an party office-a inkhawmah ZPM leader chuan Serchhip by election leh LMC inthlana sum thiltihtheihna khenbeh a ni hian kan ram hawi zawng leh kalphung tur nasa takin a her danglam mek tih a sawi a. ZPM chu hnehna changtu a ni loa, hnehtu chu Pathian leh mipui an ni tih sawiin, MLA inthlan turah hian an chak angem an hriat loh rualin inthlan erawh an nghakhlel hle tih a sawi.
An thutiam anga an awm leh lo a nih chuan chhuahsan leh mai tura party mite ti ngam awmchhun party an ni tih tih a sawi a. An policy leh innghahna chu ramin a dampui dawn tih a sawi. “Kan ramah project hlamzuih a tam em em a, zirchianna tel loa thil kan kalpui thin vangin kan hlawhchham thin. Sum tam tak a luangral a, chu chu ram mipuiten kan tuar nasa em em a ni,” Lalduhoma hian a ti.
ZPM a sawrkar chuan thuneihna semzai a ni dawn tih sawiin, “Mi pakhat kuta thuneihna tam tak dah kan tum lo. Corruption tih bo kan tum a, kan ramah hian corruption kan duh nge duh lo tih kumtawpa inthlan awm turah kan buk ang. Ram mipui hian eiru hote hi kan ning tawh. Corruption tih bona turin ruahmanna fel tak kan siam tawh a, kan value system thlak kan tum bawk a ni,” a ti.
An sawrkar a nih chuan land reform an ngaipawimawh dawn a, ram leilung awih dan ang zelin leilet, terrace leh thingtlang lo neihna tur ruahmanna an siamfel tawh bakah Forest reserve awmna tur thlengin an ruahman tawh niin ZPM hruaitu hian a sawi.
SEDP-a sum a dah cheng vaibelchhe 750 ringawt pawh ruahmanna an siam ang hian hmang dawn nise, ramin a thatpui thei hle dawn tih a sawi a. “Kan sawrkar chuan kuthnathawktute kan top priority an ni dawn. Ding chhuak duhten an dinchhuah theihna tur sawrkar kan din dawn,” a ti.