Sumdawnna atana dan loa leitha hralh tumte uluk takin kan vil dawn – Agriculture minister
Sumdawnna atana dan loa leitha
hralh tumte uluk takin kan vil dawn
– Agriculture minister
Kumin chhungin dan loa sumdawnna atana hman tur Urea bag 5424 leh DAP bag 300 man a ni tawh a. Agriculture & Farmers’ Welfare minister PC Vanlalruata chuan ram danga dan loa fertilizer thawnchhuah thin titawp turin sawrkarin ngawrh takin a bei a, uluk takin a vil reng tih a sawi.
Mizoram hmun hrang hranga loneitu a mamawhte tana lei tha an lei theih tura an department kaltlanga ruahman chu minister hian Ch. Saprawnga Truck Terminal Rangvamual atangin Inrinni khan a vailiam a. India ram chu khawvela mihring tamna ber a nih angin, buh leh bal kan mamawh pawh a sang a. Thlai chinna leilung a dak tawh em avangin, kumtinin buh leh bal thar a tlahniam zel a. Loneituten thlai tam zawk an thar theihnan lei tihthatna (fertilizer) hman a ngai a, amaherawhchu fertilizer hi thil man to tak, loneituten an lei phak loh niin, tlawm taka an lei theihnan sawrkar laipui chuan kum 1957 khan ruahmanna thar siamin, fertlizer siamtu company-te hnenah a siam man hi sawrkar laipuiin zaa 90 dawn a pek sak tih a sawi a ni.
Sawrkar laipui thuchhuah zawmin Mizoram pawhin Agriculture department kaltlangin thlai chinna ram zau zawng mil leh thlaichinna leilunga thlai mamawh chaw awm zat (soil fertility) milin sawrkar laipuiah report a pe thin a. Chutiang chuan kumtin sawrkar laipui atangin loneituten Mizoram chanvo fertilizer tlawm takin an lei tur a dawng thin tih a sawi.
“Mizoram quota fertilizer hi a chanvo neitu loneituten maximum retail price ngeia an lei theihnan leh hnianghnar taka an hmuh theihnan sawrkar chuan theihtawp chhuahin, ram danga dan loa fertilizer thawnchhuah thin titawp turin ngawrh takin a bei a. District hrang hranga fertilizer inspector, police leh magistrate-te nen tanghoin dan loa leitha thawnchhuak thinte uluk taka vil reng an ni,” PC Vanlalruata hian a ti. Kumin chhung hian dan loa sumdawnna atana hman tur Urea bag 5424 leh DAP bag 300 man a ni tawh tih a sawi a ni.
Loneituten man man, hnianghnar leh an mamawh huna fertilizer an hmuh theihna turin Mizorama fertilizer dealer pakhat MAHFED Ltd. kaltlangin Urea bag 11200, TSP bag 1800 leh MOP bag 1000 chu minister hian a vailiam a. MAHFED Ltd. hnuaia fertilizer zawrh chhuah tur hi a mamawh tak tak ten an lei theihna turin uluk taka vil zui reng a ni dawn. Fertilizer hi sawrkar ruahmanna angin MAHFED Ltd. kaltlang chauha lei theih tur a ni a, hriatchian duh nei tan MAHFED office-ah zawh chian theih a ni.
Kum thum chhunga India sawrkarin fertilizer siamna atana sum a hman zat chu – 2022 ah cheng vaibelchhe 254798, 2023-ah vbch. 195420, 2024-ah vbch. 177129 a ni.