Sumdawnna thila inbe leh turin US team-in India tlawh dawn

US team chuan ram pahnih inkara sumdawnna inremna tur rawtna siam tura inbe leh turin August 25 hian India an tlawh dawn niin Thawhlehni khan thuneituin a sawi.
Indian sorkar thuneitu hian hun tiam chin, August 1 a thlen dawn hnaih avangin sumdawnna inremna lailawk siam tum a ni tih a sawi bawk.
August 1 hi US President Donald Trump-a’n ram tam tak laka tariff sang a lak tum a tihkhawtlai mek tawp ni a ni dawn a, India pawh tihsan tur zingah telin 26% lak a tum.
“US team chuan a thawh rukna inbe turin an lo zin dawn a ni,” a ti.
India leh US team hian kar hmasa khan Washington-ah a thawh nga nan inbiain inremna eng emaw zat an siam tawh.
India aiawha hotu, Department of Commerce Special Secretary Rajesh Agrawal leh Assistant US Trade Representative for South & Central Asia Brendan Lynch te chuan inbiakna hi an ho a ni.
Washington-a inbiaknaa inremna an neih kha a pawimawh hle a, August 1 thleng hun tiam a nih avangin a hmain inremna lailawk hi an siam thei a ni.
April 2 khan Trump-a chuan ram dang atanga bungrua an lak luhah chhiah (tariff) sang tak an la dawn tih apuang a, hei hi ni 90 chhung, July 9 thleng tihkhawtlai niin a hnuah August 1 thleng pawh sei a ni a, hemi hun chhung hian ram tam takin chhiah tihsansak lo turin America hi an dawr hlawm.
India hian US chu lo neihna lam kaihhnawih leh ni tin mamawh thilah ngaihhnathiam turin a phut a. New Delhi hian tun thleng hian zalen taka sumdawnna inremna a ziakpui ram lakah ni tin mamawh thil ang chi-ah chhiah a la ngai lo.
Lo neitu pawl hrang hrangte pawhin sorkar chu inremna an siam turah anmahni kaihhnawih thilah chhiah tisang lo tura inremna siampui ngei turin an ngen hlawm bawk.
India hian 26%-a tariff tihsan chu kalpui lo turin US hi a dawr a. Steel leh aluminium (50%) leh lirthei kaihhnawih (25%)-ah pawh tisang lo turin kal dan a dap bawk a. Heng thil hi inbiaknaah pawh an sawi lian ber a ni.
Hetih lai hian US-in a laka chhiah lak a tisang vak a nih chuan India hian WTO (World Trade Organization)-in inkaihhruaina a neih angin a tihlet nan chhiah sang takin a laksak ve thei bawk.
India hian thawktu mihring mamawh tam chi atanga siam chhuah thil – textiles, tlereuh, savun bungruang, thawmhnaw, plastic, bawlhlo, sangha, tel chi, grape leh balhla-ah pawh chhiah tisang lo turin US hi a dawr bawk.
US ve thung hian industry bungrua, lirthei, a bikin electric vehicle, uaiin, petrochemical product, lo neihna thil bungrua, ni tin mamawh, apple, tree nut leh thlai chi tihdanglam ang chi-ah chhiah lak san a duh ve thung.
Ram pahnihte hian favang, September-October vel hian bilateral trade agreement (BTA) an siam theih beisei a ni a. Hemi hma hian a lailawka lo hman tur inremna neih ngei an tum bawk.
India hian US-ah hian kumin tangka kum kal meka April-June inkara US-a a thil thawn chu 22.8%-a pungin $ tluklehdingawn 25.51 man a tling a, a lak luh pawh 11.68%-a pungin $ tluklehdingawn 12.86 man a la lut a ni.