Mizoram sawrkarin Sumsuih Village Council a suspend chu chhan bulfuk nei lo a nih avangin order hi sut leh turin an ngen tih ZPM party chuan an sawi.
ZPM hruaitute sawi danin, 2022 April 19 khan MNF Unit Sumsuih chuan Sumsuih VC hi point pathum – safety reserve chhunga bawng vulh mi 5 hnena ram pek; supply reserve humhalh chungchangah thu an chhuah anmahni vekin an bawhchhia; sawrkarin lo hal hun a tih pela hal mi ram tihkan chungchangah action an la lo; safety reserve chhung an vawnghim zo loa, hmun 5-ah mimal thing zaina a awm tia an hekna chu Local Administration Department chuan a enfiah tur a tir a, chhuichiang a, thutlukna leh thurawn pe turin Ombudsman an hriattir zui a ni.
Ombudsman judgement & report-a a lan dan chuan heng hekna te hi thu chiang tawk lo leh sawifiah nghal mai theih te a nih avangin VC thiah/ suspend na thamah a ngai loa, inhekna kaihhnawiha siamthat leh chinfel ngai awmte siamtha a, chingfel turin thurawn a siam a ni.
Hetiang a nih lai hian MNF Unit hi LAD minister hnenah an zualko a, suspend an nih thu hi VC hian an hre zui ta tih an sawi.
ZPM hruaitute sawi danin, Sumsuihah hian VC member pali neiin ZPM-in sawrkarna a siam a, sawrkarin a suspend thut dawn tih hre loin 2023 April 26 zan khan VC member pakhat a bang a, Congress VC member pakhat chu ZPM-ah a lut ve thung a, a tuk lawkah suspend order-in a deng zui a ni.
Suspend-na lehkha hi 2023 April 19-a issue angin inziak mah se, 2023 April 27 zingah lehkha hi VC-te hian an hmu ve chauh a. Congress VC member pawh hi suspend a ni tih inhre loin April 26 zana lawmluh a ni.
MNF Unit Sumsuihin a puhna, ramngaw humhalh veng tha lo leh tichereu ang zawnga hekna chu, tuna VC ten enkawlna hnuaiah Sumsuih khua hian ramngaw humhalh chungchanga an hnathawh dan leh safety reserve an humhalh that vangin thla 6 liamta mai khan DDK Aizawl chuan ramngaw humhalh chungchangah program hial an siamsak zawk tih an sawi a ni.
Thuneihna hmangsual lui a, diklo tak hekna avanga Sumsuih VC suspend an ni chu an dem a, suspend order hi a rang lama sut turin Mizoram sawrkar an ngen tih ZPM hian an sawi.
Sumsuih VC suspend tak sut leh turin sawrkar ngen
Get real time updates directly on you device, subscribe now.
Prev Post